И.И. Константинов-Дэлэгээт Уйбаан аатынан Сулҕаччы орто оскуолатыгар үгэс буолбут «Көмүс күһүн» атыы-эргиэн дьаарбаҥката буолан ааста. Бу күн эбиэттэн киэһэ оскуолабыт уһун көрүдүөрэ ас-үөл минньигэс сытынан туолла. Оскуола оҕолоро төрөппүттэрин кытта дьиэлэригэр астаабыт бурдук астарын атыылаатылар.
Үтүө үгэскэ кубулуйбут “Көмүс күһүн” дьаарбаҥкаҕа бары кылаастар олус көхтөөхтүк кытыннылар. Дьэ манна туох-туох баар этэй: эттээх, хортуоппуйдаах бэрэски, сакалааттаах минньигэс пончик, буулочка, бэчиэнньэ, тиэстэҕэ сууламмыт сосиска, пицца арааһа, блины, панкейк, “Глухариное гнездо!, вафля, корн-дог, салат, шашлык, сибиэһэй собо, ыһаарыламмыт, тууһаммыт балык о.д.а. Маны таһынан сайынын бүөбэйдээн үүннэрбит оҕуруоттарын аһын, кыһыҥҥыга хаһаас салаат оҥорбуттарын аҕалан, оҕуруота суох дьон үөрэ-көтө атыылаһан бардылар.
Кэтэх хаһаайыстыбалаах ыал сүөгэй, дьиэтээҕи куурусса сымыыта, үтэһэлээх эт, халадьыас атыылаабыттара хамаҕатык барда. Оҕолор бары минньигэс астаах этилэр. Ити курдук үөрэнээччилэр элбэх аһы атыылаан, биисинэскэ бэйэлэрин холонууларын оҥорон, дьиэ кэргэҥҥэ дохуот киллэриммиттэрэ. Бу күн биир уратытынан, кылаастар кабинеттарын аанын күһүҥҥүлүү тиэмэлээн киэргэппиттэрэ буолар.
Бу күрэх уратытык, сонуннук көстүбүтэ. Бастыҥ киэргэтиилээх ааннарынан 1, 3, 5, 11 кылаастар буоллулар. Эдэр ыал Надежда, Дмитрий Николаевтар быйыл улахан оҕолоро оскуола боруогун атыллаан 1 кылааска үөрэнэ киирдэ. Николаев Толя ийэтиниин эттээх, ристээх фаршированнай блины атыылаан, онтон киирбит харчытынан дьаарбаҥкаттан атын ас атыылаһан ийэтин, аҕатын, быраатын, балтын үөртэ.
Онтон Яна, Анатолий Максимовтар оҕолорунаан Олег, Сандал уонна кырачаан Сарыал буолан шашлык нобуорун атыылаатылар. 3-с кылаас үөрэнээччитэ Олег атыытын рекламалаан сүүрэн-көтөн дьон болҕомтотун бэркэ тарта. 11 кылаас үөрэнээччитэ Степанова Сайаана бэйэтэ оҥорбут ытарҕатын, броһун учууталлара сэнээрэн ылбыттара. Ити курдук быйылгы үөрэх дьылыгар оскуолабыт биир тэрээһинэ бэрт сэргэхтик барда. «Күһүҥҥү киһи күлбүтүнэн» диэбиттии, кырдьык даҕаны, сылдьыбыт дьон бары үөрэн-көтөн бардылар.
Карина НЕУСТРОЕВА, Яша АЛЕКСЕЕВ, 5 кылаас үөрэнээччилэрэ, «Эрэл» медиацентр