Улуус хаһыатыгар сурутууга нэһилиэк баһылыктарын ортотугар эстафета биллэриллибитэ. Бу күннэргэ эстафетаны Сулҕаччы нэһилиэгин баһылыга Артем Степанов тутан хаһыакка биир сылга толору сурутта.
“Мин бары улууспут олохтоохторун, ыраах-чугас олорор биир дойдулаахтарбытын соҕотох улууспут “Амма олоҕо” хаһыатын өйүөҕүҥ диэн ыҥырабын. Тоҕо диэтэр билигин интернет сайдыбыт үйэтигэр социальнай ситиминэн сонуну ааҕабыт диэн хаһыакка сурутуу лаппа аччаата. Ол гынан баран хаһыакка биһиги олорор улууспут, нэһилиэкпит сонуннара, кини дьоно-сэргэтэ, историята барыта тахса турар. Билиҥҥи кэмҥэ улууһун хаһыатын аахпат буоллаххына, эн сайдыылаах киһи дэнэрин тутах. Хаһыакка тахсар сонуннар, чахчылар барыта кырдьыктаахтар. Онон бука барыгытын өссө төгүл хаһыакка толору биир сылга сурутан, кэлэр 2026 сылга хаһыаты сыта-олоро ааҕар кыахтаныҥ. Мин бэйэм эстафетабын ыаллыы сытар Соморсун нэһилиэгин баһылыгар Алексей Юрьевич Кононовка биэрэбин”, — диэн Артем Германович санаатын үллэһиннэ.
Улуус хаһыатын өйөөбүт баһылыкпытыгар барҕа махтал буоллун!
“Амма олоҕо” хаһыат