Муус устар 6 күнүттэн ыытыллар турар сыл иккис аҥарыгар чэпчэтиилээх сурутуу түмүктэнэрэ бу кэллэ. Бу күннэргэ ким сыл бастакы аҥарыгар эрэ суруппут, тиэтэйэн, улуускут соҕотох хаһыатыгар сурутарга тиэтэйиҥ. Амма улууһун баһылыга Степан Кузьмин улуус хаһыатын төһө да биир сылга толору суруттардар, аҕам саастаах киһиэхэ сурутта.
“Убаастабыллаах биир дойдулаахтарым, бу күннэргэ ыытылла турар сурутуу хампаанньатыгар кыттыһаммыт, тапталлаах Аммабыт улууһун кырдьаҕас хаһыатыгар үөрүүнэн суруттум. Бэйэм биир сылга толору суруппутум эрээри, атын чугас билэр киһибэр сыл иккис аҥарыгар сурутан биэрдим. Быйыл биһиги улууспутугар Тыа хаһаайыстыбатын сыла биллэриллэн сыл саҕаланыаҕыттан элбэх тэрээһиннэр ыытылла тураллар. Номнуо ахсыс күрэхтэһии буолан ааспыта. Бу күрэхтэри сэргэ биһиги уопсай куоталаһыы түмүгэр нэһилиэктэр икки ардыларыгар уонтан итэҕэһэ суох матырыйаал тахсыытын сэргэ, хаһыакка сурутууну эмиэ киллэрбиппит. Онно ким төһө нэһилиэнньэлээҕинэн көрөн, бырыһыан тахсан, наадалаах биир улахан баалы ылыахтаах. Биһиги улууспут олоҕун күннэтэ сырдата турар, баар суох соҕотох хаһыаппытыгар бука бары сурутуоҕун диэн тэрилтэ салайааччыларын, бэйэм кэллиэгэлэрбин ыҥырабын”, — диэн Степан Николаевич сурутууну көҕүлээн эттэ.
“Амма олоҕо” хаһыат