Улуус хаһыатыгар кэлэр сылга толору сурутууга хампаанньа түмүктэнэрэ бу кэллэ. Күн бүгүн чэпчэтиилээх сурутуу ахсынньы 3 күнүттэн саҕаланан ахсынньы 13 күнүгэр диэри ыытылла турар. «Чапчылҕан нэһилиэгэ» тыа сирин түөлбэтин баһылыга Дьулустан Юшков эрэдээксийэҕэ кэлэн бу түгэни мүччү туппакка суруйтарда.
«Мин сурутуу эстафетатыгар үөрүүнэн кыттыһабын уонна миэхэ кэллиэгэм, Мээндиги нэһилиэгин баһылыга Илья Владимирович Семенов биэрбитин ыламмын, биир сылга «Амма олоҕо» хаһыакка толору суруттум. Хайдах киһи улуус хаһыата суох олоруой. Онно эбии эн салайааччы буоллаххына хайаатар да хаһыакка сурутуохтааххын дии саныыбын. Хаһыаттан киһи элбэх информацияны ылар. Биир бэйэм улууһум хаһыатын куруутун сурутабын. Төһө да ардыгар хойутаан кэллэр, манна син биир суолтата сүппэт элбэх ыстатыйалар бааллар. История, олохтоох бэйэни салайыныы, үлэһит талааннаах дьон туһунан сэргээн ааҕабын. Кэлэр сылга улахан бэлитиичэскэй суолталаах түгэн буолаары турар. Ол курдук Арассыыйа судаарыстыбаннай Думатын дьокутааттарын талыахпыт. Онно туһааннаах матырыйааллар хаһыакка хайаатар да тахсыахтара уонна улуус хаһыата кырдьыктаах эрэ информацияны таһаарар дии саныыбын. Билигин социальнай ситимнэринэн араас сонун барыта тарҕанар. Онно эбии искусственнай интеллект олус сайынна. Ол иһин киһи итэҕэйбэт түгэннэрэ бааллар. Кырдьаҕас улууспут хаһыата бу сыллар тухары биһиэхэ чугас, эрэллээх доҕор буолан кэллэ. Онон кинини өйөөн хайаатар да сурутаргытыгар нэһилиэгим олохтоохторун ыҥырабын уонна эстафетабын ыаллыы сытар Бөтүҥ нэһилиэгин баһылыгар Саргылана Васильевна Борисоваҕа биэрэбин»,- диэн Дьулустан Авксентьевич санаатын тириэрдэн барда.
«Амма олоҕо» хаҺыат