Амма улууһун баһылыгын бастакы солбуйааччы Василий Бураев уонна тыа хаһаайыстыбатын управлениетын салайааччы Ион Кононов Абаҕа, Сэргэ Бэс уонна Сулҕаччы отчуттарын кытта көрүстүлэр.
“Биһиги ходуһаларга, сайылыктарга сырыыбыт салҕанар. Ол чэрчитинэн Абаҕаҕа тахсан улууспут биир бөдөҥ хаһаайыстыбатын салайааччыта Василий Васильевич Тимофеевы уонна үлэһиттэри кытта көрүстүбүт. Бу эҥэр ардаабыт буолан, үүнүү куһаҕана суох. Хаһаайыстыба салайааччыта тиэрдиллибит былааны толороргэ эрэллээх уонна өссө арыый саппаас да оттоон кыстыгы этэҥҥэ туоруохпут диэн эрэллээх. Үүт былаанын да толорор соруктаахтар. Үлэһиттэрэ бааллар, онон үлэ-хамнас бара турар. Уматык өртүгэр эрдэ хааччынан улахан кыһалҕа суох. Онон кэлбит нуорманан ыланнар, хомууру ыытыахтаах. Хомуурга балаҕан ыйын саҥатыгар тахсарга былааннаналлар.
Онтон Сулҕаччыга чааһынай отчуттары, бааһынай хаһаайыстыбалары кытта көрүстүбүт, оттуур ходуһаларыгар сырыттыбыт. Манна эмиэ от үүнүүтэ кэмигэр ардаабыт буолан үчүгэй. Онон күн-дьыл туран эрэ биэрдэр оттуохпут диэн этэллэр. Билигин бу нэһилиэккэ сүрүн кыһалҕа уматык боппуруоһа буолар. Ол курдук “Саханефтегазсбыт” уматыгы ааспыт нэдиэлэҕэ аҕалыахтааҕын кэккэ биричиинэнэн кыайан аҕалбакка, кэлэр нэдиэлэ бүтүүтэ кэлэр буолла. Бу туһунан хампаанньа салалтатын кытта кэпсэтэ олоробут. Онно 16000 туонна таараланар уматыга кэлиэхтээх. Оперативнай ыстаап бу кыһалҕаны болҕолмтоҕо ылан үлэлэһиэ. Маны тэҥэ үлэһиттэр биир кыһалҕа үүт харчыта кэлэн испэтэ диэн эттилэр. Маныаха бу күннэргэ 33 бырыһыана кэлэн, ким төһөнү туттарбытынан барыаҕа. Онон үлэ дьоно арыый өрө тыынан, кыстыкка этэҥҥэ бэлэмнэнэн киириэхтэрэ диэн эрэнэбит”, — диэн улуус баһылыгын бастакы солбуйааччы Василий Бураев сырыы түмүгүнэн билиһиннэрэр.
Строд аатынан хаһаайыстыба сиилэс хомуйуутун түмүктээн, кэлэр нэдиэлэттэн сенажка киирээри бэлэмнэнэр. Кыстык хотоннорун аттыгар сиилэс уган үлэ күөстүү оргуйар. Бэрэссэдээтэл Василий Тимофеев бэлиэтээбитинэн, кинилэр уопсайа 560 гектарга туорахтаах култуураны ыспыттар. Быйыл ааспыт сыллааҕар үүнүү орто, ол да буоллар гектартан ортотунан 15 цн ылыахпыт диэн суоттаналлар. Сиилэстэрин түөрт күн устата быстарбыттар. Былааннаах сиилэстэрин 1000 туоннаны укпуттар. Онтон хомуур үлэтигэр балаҕан ыйын саҥатыгар киирэргэ суоттаналлар. Үлэһиттэр бааллар.
Сэргэ Бэскэ салалта Константин Фомин бааһынай хаһаайыстыбатыгар сылдьан сиилэстээһин үлэтин, бурдук бааһынатын, хортуоппуй үүнүүтүн көрдө. Үүнүү үчүгэй. Хаһаайыстыба салайааччыта Константин Фомин былааны толоруохпут, үүнүү бурдукка, окко, хортуоппуйга да куһаҕана суох. Саамай сүрүнэ ардах кэлимиэн наада диэн этэр. Чахчыта да билигин үлэ дьонугар күн-дьыл туран биэрэн, сүөһү кыстыгын бэлэмин харгыстаамыан наада.
Сиһилии бу хайысха отчуттарын туһунан хаһыакка сырдатыахпыт. Сурутун, ааҕын.
“Амма олоҕо” хаһыат