Бүгүн академик Л.В. Киренскэй аатынан сквергэ тэрээһин ыытыллан, пааматынньыгар сибэкки дьөрбөтүн уурдулар. Бу күн биллиилээх биир дойдулаахпыт күн сирин көрбүтэ. Тэрээһиҥҥэ улуус баһылыга Степан Кузьмин кыттыыны ылла уонна академик Леонид Васильевич Киренскэй аатынан стипендия олохтуурун туһунан эттэ.
Бүгүн, муус устар 7 күнүгэр биллиилээх биир дойдулаахпыт академик, Социалистическай Үлэ Дьоруойа Леонид Васильевич Киренскэй төрөөбүт күнэ. Бу бэлиэ күҥҥэ уонна космонавтикаҕа анаммыт нэдиэлэ чэрчитинэн кини аатын сүгэр Амматааҕы лиссиэй үөрүүлээх линейкэни ыытта, пааматынньыгар сибэкки дьөрбөтүн ууруу буолла. Бу тэрээһиҥҥэ улуус баһылыга Степан Кузьмин кыттыыны ылла. Эҕэрдэ тылларын улуус баһылыгын сэргэ, лиссиэй дириэктэрэ Дария Захарова, лиссиэй 11 кылааһын үөрэнээччитэ, “Бастакылар хамсааһыннарын” Федеральнай сэбиэтин иккис ыҥырыытын кыттыылааҕа Ян Карамзин тириэртилэр.
“Арассыыйа науката инники хардыытыгыра сүҥкэн кылааттаах, биһиги киэн туттар биир дойдулаахпыт Леонид Киренскэй олорбут олоҕо бука барыбытыгар холобур буолуохтаах. Кини дойдутугар таптала, талан ылбыт идэтигэр бэриниилээҕэ, түгэх тыа сирин уола үөрэххэ тардыһыыта күүстээх буолан соҕуруу баран үөрэнэн, наукаҕа сыстан, дьарыктанан академик буолан тахсыбыта – бу барыта үүнэр көлүөнэ кини курдук буолан тахсарыгар холобур. Кини олоҕо көннөрү биһиги улууспут историятын биир кэрчигэ эрэ буолбакка, Ийэ дойдуга бары билиигин биэрэн туран үлэлээһин чаҕылхай көстүүтэ. Онон бүгүн мин быһаарыы ылынан, кини аатын сүгэр лиссиэй бастыҥ ситиһиилээх үөрэнээччитигэр Леонид Киренскэй аатынан анал стипендиябын олохтоотум. Бу стипендияны үөрэххэ, наукаҕа уонна уопсастыбаннай үлэҕэ үрдүк ситиһиилэри ситиспит үөрэнээччи ылыаҕа”, — диэн этэр Степан Николаевич.
“Амма олоҕо” хаһыат
Хаартыска: Августина Иванова