2015 сылтан саха норуотун аатырбыт ырыаһыта, тапталлаах мелодиһа, драмартыыһа Христофор Максимов аатынан саха ырыатын сайыннарар уонна өйүүр пуонда дириэктэринэн үлэлиир Михаил Санников Олоҥхо ыһыаҕар тойук уонна оһуокай күөн күрэстэригэр кытынна. Өрөспүүбүлүкэ араас улуустарыгар ыытыллыбыт Олоҥхо ыһыахтарыттан аммалар тэрээһиннэрэ саамай үрдүктэрэ диэн бэлиэтээн эттэ.
Олоҥхо ыһыахтарыгар Христофор Трофимович Максимов аатынан пуонда куонкурус да ыытан, кэнсиэр да биэрэн күүскэ кыттар. Маны таһынан Христофор Максимов үбүлүөйдээх сылларыгар Сулҕаччыттан саҕалаан Дьокуускай куоракка тиийэ киэҥ далааһыннаах кэнсиэрдэри оҥоробут. Пуондаҕа биллиилээх норуодунай уонна үтүөлээх артыыстар бааллар, кинилэр сүрүн күүс буолаллар. Улуустартан эмиэ күүскэ кытталлар. Биһиги саамай үөрэрбит диэн дэгрэҥ ырыаҕа эдэр ыччат күүскэ ылыста, — диэн Михаил Семенович этэр.
Элбэх общественнай үлэттэн быыс булан, Михаил Семенович төһө кыалларынан култуура эйгэтигэр көхтөөхтүк кыттар. Элбэх биллиилээх мелодистар ырыаларын Христофор Максимовтан, Валерий Ноевтан саҕалаан ыллыыр, араас тэрээһиннэргэ ыҥырдахтарына аккаастаммат, үөрэ-көтө кыттар. Бу да сырыыга Олоҥхо ыһыаҕар Христофор Максимов «Ботуобуйа» уонна Валерий Ноев «Кыыс Амма» ырыалын истиҥ иэйиилээхтик толордо.
Быйылгы Олоҥхо ыһыаҕар тойук уонна оһуокай күөн күрэстэригэр кыттыытын туһунан биһиги ыалдьыппыт бу курдук билиһиннэрдэ:
Кэнники тойугу биһирээн тойукка кыттабын. Нэһилиэктэргэ, улуустарга кыттан баран, быйыл Олоҥхо ыһыаҕар тойуктаан боруобалаатым. Уонна оһуокайга кытынным. Оһуокайга киһи атын турукка киирэр. Этэн киирэн бардахха, бэйэтэ-бэйэтиттэн тахсан киһи санаатын толору этэр. Тус бэйэҕэр да, кынаттыы сылдьар дьоҥҥо да олус туһалаах. Онон дэгэрэҥ ырыаны таһынан кэлэр өттүгэр тойукка уонна оһуокайга кыттыам диэн сэмэй ис былааннаахпын.
Вера ИВАНОВА