Бу күннэргэ Амма нэһилиэгин “Муона” түөлбэтин олохтоохторо үөрүүлэрэ үрдүү сылдьар. Быйылгы кыһыны кинилэр оһох оттубакка көрсөр кыахтаннылар. Бу барыта биир сомоҕо түмсүү түмүгэр буолла.
“Бу алааска ыал олохсуйан олорбута 30-тан тахса сыл буолла. Ол тухары оһох оттон олорон кэллилэр. Киин ититэр ситимҥэ холбонуу туһунан туруорсуу ыраатта. Ити эрээри күүстээх хамсаныы ааспыт сылтан саҕаланан, бу күһүҥҥэттэн түөлбэ олохтоохторо “Стадион” хочуолунайыгар холбонор кыах баар буолбутугар күүскэ турунан, бэйэлэрэ үп-харчы кыттыһан, бу улахан үлэ түмүктэнэн эрэр. Манна түөлбэ салайааччыта Иван Нерлов хамаандатын кытта тэрээһиннээх үлэни ыыта сылдьар. Олохтоох дьаһалта турба булуутугар, төлөбүрүгэр эмиэ көмөлөстө.Күн бүгүн ыалларга сылааһа кэлэн, оһох оттубат үөрүүтүн билэн олороллор. Онтон сорохтор бу күннэргэ сылаас киллэрээри түбүгүрэллэр. Үлэлэр бу улахан тымныылар түһэ иликтэринэ бүтүөхтээхтэр. Киин ситимҥэ холбонон, оһох оттортон босхолонуу – бу нэһилиэнньэ биир социальнай көмүскэллээх буолуута, кини олоҕун чэпчэтии биир көрүҥэ буолар”, — диэн этэр Амма нэһилиэгин баһылыга Михаил Артемьев.
Билигин Муона алаас олохтоохторо сылаас дьиэҕэ уһуктан, түүннэри оһох кэтээн-манаан олороллоро, сорохтор мас булуутун кыайбакка, оһох оттор да кыһалҕатыттан көһөн атын сиргэ кыстыыллара тохтоото. Амматааҕы оҕо сайдар киинин эбии үөрэхтээһинин педагога Анна Матвеева оннук көһөн, дьиэ наймылаһан олорбута хаһыс да сыла этэ.
“Оо, быйыл дьэ дьиэбэр кыстыыр буолан үөрүүм улахан. Дьиэбит сып сылаас. Уһун да сылларга кэтэстибит. Учуутал сылыгар 2010 сыллаахха дьиэбэр киирбитим. Онтон ыла оһох оттон, онтон кэлин ыксаан атын оттуллубат дьиэҕэ наймылаһан көһөр этим. Саас дьиэбэр кэлэрим. Биһиэхэ бу үөрүүнү бэлэхтээбит бары сыбаарсык уолаттарбытыгар, түөлбэбит салайааччыта, саамай сүүрэ-көтө сылдьар Иван Нерловка, нэһилиэкпит баһылыгар Михаил Артемьевка махталбыт улахан. Киин ситимҥэ холбонон билигин үлэлииргэ-хамныырга да үчүгэй. Аны мас да булар уустук, сыаната да сыллата ыарыы турар. Кураанах мас булар букатын да күчүмэҕэй. Онон үөрэн-астынан олоробут. Сорохторбут кэлэр сылга киириэхтэрэ. Онон бары биир сомоҕо буолан бииргэ үлэлиэҕиҥ-хамсыаҕыҥ”, — диэн Анна үөрүүтүн үллэстэр.
Киин ситим тардыллан, турбалары бүрүйүүгэ түөлбэ олохтоохторо, оҕолуун-уруулуун бука бары тахсан үлэлэстилэр. Онон этэргэ диэри чахчы да норуот тутуута буолла. Бу курдук олохтоохтор олорон хаалбакка, бэйэлэрэ ылсан, олохтоох дьаһалтаны, сылааһы биэрэр дьиэ-уот коммунальнай хаһаайыстыбатын кытта тэҥҥэ үлэлэһэн олохторун уйгутун оҥостоллор.
“Амма олоҕо” хаһыат