Дойду Бэрэсидьиэнэ Владимир Путин тус көҕүлээһинэн киирбит национальнай бырайыактар дьон олоҕун уйгутун оҥорууга төһүү күүс буолаллара саарбахтаммат. Амма улууһун дьокутааттарын Сэбиэтин бэрэссэдээтэлэ, «Биир ньыгыл Арассыыйа» бэлитиичэскэй баартыйа улуустааҕы салаатын сэкэрэтээрин солбуйааччы Владимир Колосов, «бу бырайыактар көмөлөрүнэн үгүс тутуулар улахан куораттарга эрэ буолбакка, кыра да нэһилиэнньэлээх тыа сирдэригэр ыытыллаллара үгүс киһини үөрдэр. Ол биир туоһутунан Амма улууһугар бу аҕыйах сыл иһигэр социальнай эбийиэктэр тутуллан, “Амма” айан суолун асфаллааһын ыытылла турара да буолар» диэн бэлиэтиир.
“Биһиги өрөспүүбүлүкэбитигэр национальнай бырайыактары олоххо киллэриигэ “Биир ньыгыл Арассыыйа” бэлитиичэскэй баартыйа сүрүн күүс буолар. Ол курдук норуот бырагырааматынан 18 федеральнай бырайыагын үлэлэтэр. Бу бырайыактар дьиэ кэргэни, ордук чуолаан элбэх оҕолоох дьиэ кэргэни, аҕам саастаах дьоммутун өйөөһүҥҥэ, үөрэҕириигэ, доруобуйа харыстабылыгар, спортка, култуураҕа, урбааҥҥа, тыа сирин сайыннарыыга туһуланан үлэлии тураллар. Биһиги өрөспүүбүлүкэбитигэр, ол иһигэр улууспутугар “Оҕо спорда”, “Куттала суох суоллар”, “Куттала суох суоллар”, “Бигэ туруктаах дьиэ кэргэн”, “Кырдьаҕас көлүөнэ” курдук бырагыраамалар олоххо киирэллэр. Онтон бу соторутааҕыта саҥа таас поликлиника аһыллан үөрүүбүт үрдээтэ. Поликлиникабыт аныгы, бары ирдэбиллэргэ эппиэттиир оборудованиенан хааччыллан, манна үлэлиир да дьоҥҥо уонна эмтэнээччилэргэ, доруобуйаларын көрдөрүнэр дьоҥҥо бары усулуобуйа баар буолла. Онон инникитин да национальнай бырайыактар үлэлээн, ол көмөтүнэн үгүс тутуулар ыытыллан дьон олоҕун уйгутун түстүүргэ төһүү күүс буолуохтара”, — диэн этэр Амма улууһун дьокутааттарын Сэбиэтин бэрэссэдээтэлэ, «Биир ньыгыл Арассыыйа» бэлитиичэскэй баартыйа улуустааҕы салаатын сэкэрэтээрин солбуйааччы Владимир Колосов санаатын үллэһиннэ.
“Амма олоҕо” хаһыат