Амма улууһун баһылыга Степан Кузьмин Дьокуускайга улуус коммунальнай хаһаайыстыбатын боппуруостарынан үлэлээтэ, СӨ ГУП ОДЬКХ генеральнай дириэктэрэ Виталий Чикачевы кытта көрүстэ.
“Бүгүн улууспутугар оттук сезона түмүктэннэ. Кыстык этэҥҥэ ааста. Ол эрээри өссө быһаарыллар боппуруос элбэх. Сотору өрөмүөн үлэлэрэ саҕаланыахтара. Онон өрөспүүбүлүкэ коммунальнай хаһаайыстыбатын генеральнай дириэктэрэ Виталий Семенович Чикачевка норуот дьокутаата Александр Иванович Корякины кытта киирэ сырыттыбыт. Манна биһиги улууспут олох-дьаһах коммунальнай хаһаайыстыбатыгар турар кыһалҕалар, туруорсуллар боппуруостар тула кэпсэттибит. Ханнык нэһилиэккэ чааһынай ыаллар холбонууларын, канализационнай-ыраастыыр станция тутуутун, ууну ыраастыыр станциябыт иккис этабын, “Ыччат” кыбаарталын олохтоохторо “Стадион” хочуолунайга холбонууларын иккис этабын, үбүлээһинин, “Емельяновка” хочуолунайын уонна да атын боппуруостары таарыйан бэрт киэҥ кэпсэтии буолла. Түмүккэ кэлэр нэдиэлэҕэ Амма улууһугар турар олох-дьаһах коммунальнай хаһаайыстыбатын боппуруостарынан уонна инники сайдыытын туһунан улахан мунньаҕы туруорарга быһаардыбыт. Мунньахха өрөспүүбүлүкэ олох-дьаһах коммунальнай хаһаайыстыбатын уонна энергетикаҕа министиэристибэтэ, ГУП ОДЬКХ салалтата, бары нэһилиэк баһылыктара кыттыыны ылыахтара. Манна тахсыбыт кэпсэтиилэр,этиилэр түмүктэринэн сөптөөх быһаарылары ылыахпыт диэн эрэнэбин ”, — диэн Степан Николаевич көрсүһүү туһунан сырдатта.
“Амма олоҕо” хаһыат