Бүгүн Арассыыйа Федерациятын Сэбиэтин аграрнай уонна ас-үөл бэлиитикэтигэр, айылҕаны туһаныыга кэмитиэтин бэрэссэдээтэлин солбуйааччы, өрөспүүбүлүкэбит бастакы Ил Дархана Егор Борисов 70 сааһын томточчу туолла. Егор Афанасьевич илин эҥэр сытар Чурапчы улууһуттан силистээх-мутуктаах, тыа сириттэн сайдан-үүнэн тахсыбыт буолан, бу эйгэҕэ олус чугас уонна бу эйгэ дьонун-сэргэтин кытта биир муостаҕа туран кэпсэтэр, тыа улуустарын, хаһаайыстыбаларын сайдыытыгар ураты болҕомтотун уурар. Амма, Мэҥэ Хаҥалас улуустарын бочуоттаах олохтооҕо, СӨ норуотун хаһаайыстыбатын үтүөлээх үлэһитэ, Ил Түмэн судаарыстыбаннай мунньах VI ыҥырыылаах мунньаҕын дьокутаата, меценат Руслан Федотов кинини кытта алтыспыт бэлиэ түгэннэрин туһунан санаатын үллэстэр.
“Егор Афанасьевич Борисов чахчы тыа сириттэн үүнэн тахсыбыт киһи буолар. Кини дойдутугар салайар эйгэҕэ үлэлии сырыттаҕына, өрөспүүбүлүкэҕэ ыҥырбыттара. Бэйэтэ идэтинэн инженер- механик буолан, биһиги кинилиин билсэрбитигэр тута уопсай тылы булбуппут. Иккиэн бу эйгэ дьоно буоллахпыт. Егор Афанасьевич тыа хаһаайыстыбатын министиэристибэтигэр таһаарыылаахтык үлэлээбитэ. Олус ирдэбиллээҕэ. Мин кинилиин, Ил Дархан буолан олордоҕуна, чугастык 2016-17 сылларга “Амма” хаһаайыстыбатын өрө тардыы боппуруоһунан ыкса билсибитим. Билэргит курдук хаһаайыстыба балаһыанньата оччолорго олус ыарахан этэ, 100-чэкэ мөлүйүөн иэстээҕэ, туох баар баайын солуок ууран олороро. Дьэ онно Егор Афанасьевич миигин, бу хаһаайыстыбаҕа үлэбин саҕалаабыппын, кини туһугар ыалдьар диэн бүк эрэллээх ыҥыран ылан кэпсэппитэ.
Оччолорго тыа хаһаайыстыбатын миниистирэ Петр Николаевич Алексеев этэ. Бары үһүөн олорон, ону сэргэ улуус баһылыга Николай Архипович Архипов буолан хаһаайыстыбаны быыһыыр, хайдах көмөлөһөр туһунан кэпсэппиппит. Бу кэнниттэн өссө хас да көрсүһүүлэр буолан ааспыттара. Ол иннинэ “Амма” ССПК эмиэ уустук балаһыанньаҕа киирбитигэр, кэпсэтии баран, тэрилтэни өрө тардыы барбыта. Оччолорго тэрилтэни кини Новосибирскай куоракка бииргэ үөрэммит доҕоро Иван Николаевич Емельянов салайар этэ. Егор Афанасьевич доҕотторун олус чугастык саныыр уонна кинилэргэ хайа кыалларынан күүс-көмө буолар. Күн бүгүнүгэр диэри бары көрсөллөр, истиҥ сыһыаннаахтар. Егор Афанасьевич тыа сириттэн үүнэн-сайдан тахсыбыт, кини эйгэтигэр улааппыт, бэйэтэ оробуочай диэн кимин билэр буолан, тыа сирин сайдыытыгар улахан болҕомтотун уурар. Онон дириҥ историялаах, өрөспүүбүлүкэҕэ саамай элбэх бурдук ыһар бааһыналаах хаһаайыстыба хайаан да үлэлиэхтээх диэн санаанан салайтаран, миэхэ, тыа хаһаайыстыбатын министиэристибэтигэр эмиэ оннук сорук туруоран, хаһаайыстыба күн бүгүн үлэлии-хамсыы, саас бурдугун ыһа, күһүн хомуйа олорор. Аны “День поля” диэн өрөспүүбүлүкэҕэ ыытыллар тэрээһини атаҕар тура сатыы сылдьар хаһаайыстыба базатыгар, Покровкаҕа ыыттарбыта. Онно элбэх соҕурууттан собуоттар бэрэстэбиитэллэрэ кэлбиттэрэ, техникаларын аҕалан көрдөрбүттэрэ. Ол техникалартан үгүс өттө хаһаайыстыбаҕа хаалан күн бүгүнүгэр диэри үлэлии сылдьаллар.
Егор Афанасьевич мин тус олохпор эмиэ оруоллаах. Ол курдук бу үлэлэһэ сылдьан, элбэхтик көрсөн, кини миигин Ил Түмэн дьокутаатынан турарбар сүбэлээбитэ. Мин бастаан соһуйа истэн баран, кини этиитин ыараҥнатан көрөн, чахчы да судаарыстыбаннай таһымнаах дьокутаат элбэҕи оҥоруон, ситиһиэн сөп дии санаан сөбүлэһэн, кандидатынан турбутум уонна бар дьонум итэҕэлин ылан биэс сыл устата үлэлээбиппинэн киэн туттабын. Бу кэм устатыгар Егор Афанасьевыһы кытта “Амма” хаһаайыстыбатын атаҕар туруутугар уонна атын да боппуруостарынан элбэхтик алтыһан, кэпсэтэн, сүбэлэһэн үлэлээбитим. Мин кинини ирдэбиллээх, чопчу соруктары туруорар, сыыһаны-алҕаһы тута этэр, мындыр салайааччы быһыытынан сыаналыыбын. Бүгүн ытыктабыллаах Егор Афанасьевич 70 сааһын томточчу туолбутунан, күн сирин көрбүт бэлиэ күнүнэн истиҥник, иһирэхтик эҕэрдэлиибин уонна салгыы Арассыыйа таһымыгар Сахатын сирин, кини дьонун-сэргэтин уйгулаах олоҕун туһугар туруулаһар үлэтигэр ситиһиилэри, тус олоҕор дьолу, туруктаах олоҕу, туйгун доруобуйаны баҕарабын”, — диэн Руслан Еремеевич санаатын үллэһиннэ, эҕэрдэтин тириэртэ.
“Амма олоҕо” хаһыат
Хаартыскалар: Руслан Федотов тус архыыбыттан