Оҕону кыра эрдэҕиттэн үлэҕэ тардан үөрэтии үчүгэйтэн атыны аҕалбат. Сатаҕай нэһилиэгэр Кыайыы обелиһыгар сибэкки үүннэриитин уонна ону сайын устата бүөбэйдээһинин Е.А. Шишигин аатынан олохтоох орто оскуола ылан үһүс сылын көрөр-истэр. Манна сайылыы кэлбит сиэннэри үлэлэтии үтүө үгэскэ кубулуйда.
“Сатаҕайтан төрүттээх дьоммут оҕолоро сайын аайы эбэлэригэр-эһэлэригэр сайылыы кэлэллэр. Ону туһанан, кинилэр силистээх-мутуктаах дойдуларын кытта ситимнэрэ өссө улааттын, күүһүрдүн, дойдуларын таптыы үөрэнниннэр, төрүт буордарыгар чугаһаатыннар диэн санаанан, сайын үлэҕэ уһуйабыт. Биһиги оскуолабытыгар “Цветоводство” куруһуога баар. Ону салайабын. Саас аайы бэйэбит рассадаларбытын атыылыыбыт уонна бу оскуолабытыгар көрүүгэ-истиигэ бэриллибит Кыайыыбыт болуоссатын сибэккинэн симиибит, нэһилиэкпит тупсаҕай көстүүлээх буоларыгар кыһаллабыт. Манна сибэккилэри үүннэриигэ биһиэхэ төрөппүт Вариада Давидовна Васильева күүс-көмө буоларыгар махталбыт улахан. Сайын устата бу обелиска уонна Герой Лукиҥҥа анаммыт киириигэ турар сквергэ сибэкки үүннэрэн сиэннэрбит уу куттулар.
Ол курдук бэйэм уонна Судинов Степан Дмитриевич сиэннэрэ. Кинилэргэ оскуола үөрэнээччилэрэ Баир Артемьев уонна Виолетта Васильева күүс-көмө буоллулар. Бу обелиспытыгар Сатаҕайтан баран сэрии толоонугар охтубут дьоммут ааттара суруллан тураллар. Оҕолор мантан бэйэлэрин хос-хос эһэлэрин ааттарын булбуттара уонна кинилэр сырдык ааттарыгар сүгүрүйэн кыһаллан-мүһэллэн туран сайын устата сибэккилэри бүөбэйдээтилэр”, — диэн оскуола педагог- бибилэтиэкэрэ Христина Скрябина кэпсиир.
Күн бүгүн Сатаҕайга олохтоох көҕүлээһини өйүүр бырагырааманан Ийэ искибиэрэ тутуллан бүтэн үлэҕэ киириэҕэ. Манна эмиэ сайын аайы сибэкки үүнэн силигилиэ, ыччат дьон, оҕолор кэлэн ийэлэргэ сүгүрүйэр, сынньанар сирдэрэ буолуо турдаҕа.
“Амма олоҕо” хаһыат