Сатаҕай нэҺилиэгэр Учуутал декадатын чэрчитинэн волейболга күрэх ыытылынна. Бу табаарыстыы көрсүһүүнү Е.А.Шишигин аатынан Сатаҕай орто оскуолата иилээн-саҕалаан ыытта.
Тэрээһин сүрүн сыала-соруга — волейболу дьон-сэргэ сөбүлээн оонньуур успуорт көрүҥүн быһыытынан пропагандалааһын, оҕолор оонньуур таһымнарын үрдэтии, чэгиэн буоларга дьону угуйуу. Күрэҕи педагогическай үлэ бэтэрээнэ Анастасия Лукина көҕүлээтэ. Кини этиитин өйөөн успуорду өйөөччүлэр Ольга Никитина уонна Христина Скрябина көх-нэм буоллулар. Анастасия Николаевна эдэр эрдэҕиттэн успуорду өрө туппут учуутал, пионербаһаатай, баспытаатал буолар. Төһө даҕаны 79 хаарын түһэрдэр Анастасия Николаевна үлэлээбит оскуолатыгар үтүө сүбэһит, сонун идеялары олоххо киллэрэр учуутал, сиэн оҕолор үөрэхтэригэр кыһаллар эбээ, успуорт сайдыытыгар сүрэҕинэн кыһалла сылдьар ытык киһибит буолар. Эдэриттэн успуорт бары көрүҥүн таптаан олоҕун аргыһа оҥостубут, элбэх кыайыы өрөгөйүн билбит успуорт бэтэрээнэ. Чөл олоҕу өрө туппут ытык киһибит волейбол күрэҕэр ситиһиилэрин кэрэһэлиир махтал суруктара, альбомнара быыстапканан турда.
Күрэх үөрүүлээх аһыллыытын парадыгар кылаас бастыҥ спортсменнара кэккэлэһэн турдулар. Бу үөрэх сылыгар бастакы улахан спортивнай күрэх буоларын быһыытынан былааҕы күөрэтэр тосхол хамаанда хапытааннарыгар бэриллиннэ. Үөрүүлээх түгэҥҥэ нэһилиэк баһылыга Алексей Шишигин, бэтэрээн учуутал Анастасия Николаевна мустубут дьону эҕэрдэлээтилэр, успуорт дьону сомоҕолуурун бэлиэтээн эттилэр, кэнчээри ыччаппыт сайдан иһэригэр баҕаларын тириэртилэр уонна күрэх кыттыылаахтарыгар ис кыахтарын туһанан кыайыыга дьулууру баҕардылар. Күрэҕи успуорт бэтэрээнэ Гаврил Орлов иилээн-саҕалаан ыытта, сытыы түгэннэри уот харахха этитэлээн бэркэ коментаарийдаан мустубут дьону сэргэхситтэ.
Бу үөрэх дьылыгар 5-с кылаас салайааччыта, физкультура учуутала Алия Хобуева үөрэнээччилэрин олус бэркэ эрчийбит, үчүгэйдик оонньоон бэйэлэрин бөлөхтөрүгэр бастаатылар. Иккис миэстэ алтыстар, сэттистэр үһүс буоллулар. Улахан бөлөххө тохсустар бастакы, ахсыстар иккис, онустар үһүс миэстэни ыллылар. Түмүккэ бары кыайыылаах буолан түөстэригэр мэтээл кэтэн үөрүүлэрэ үксээтэ.
Хамаандаларыгар элбэх очукуону аҕалбыт, үчүгэй оонньууларын иһин “Бастыҥ оонньооччу” анал ааты Пахомов Петя (5 кылаас), Артемьев Арылхан (8 кылаас) ыллылар. “Бастыҥ көмүскээччи” Никитин Егор (6 кылаас), Андреев Андриан (8 кылаас) буоллулар, “Кэскиллээх оонньооччу” анал ааттары Артемьев Эрсан (5 кылаас), Яковлев Артем (7 кылаас) ыллылар. “Бастыҥ оонньооччу” 5 кылаас үөрэнээччитэ Женя Анисимова буолла. Төрөппүттэртэн Яковлев Ариан, Никитина Светлана үчүгэй оонньууларын иһин махтал суругунан бэлиэтэннилэр. Кылаастар икки ардыларыгар төрөппүттэр кыттыылаах күрэх үтүө үгэскэ олохсуйан эрэрэ хайҕаллаах. Тэрээһиҥҥэ оҕо төрөппүтүн кытта биир хамаанда буолбута умнуллубат үтүө түгэни бэлэхтээтэ.
Волейбол үөрүүтүн бэлэхтээбит, ыччаты кэрэҕэ угуйар бэтээрээн учууталбытыгар Анастасия Николаевнаҕа барҕа махталбытын тиэрдэбит! Эн өссө даҕаны дьоҥҥор-сэргэҕэр үтүө холобур, сүбэһит буола сырыт, чэгиэн-чэбдик буол!
Христина СКРЯБИНА