Саҥа саҕаламмыт 2024-2025 үөрэх сылыгар Е.А. Шишигин аатынан Сатаҕай орто уопсай үөрэхтээһин оскуолатыгар оскуола саҥа лидерин талар быыбар буола турар.
Бу күн оскуола дьаһалтата оскуолабыт саҥа лидерин талар тэрээһини тэрийдэ. Оҕолор сүргэлэрэ көтөҕүллэн бэйэ икки ардыгар кэпсэтиини, санаа атастаһыытын ыыттылар. Саҥа лидер оскуола олоҕунан салайтарар, үөрэнээччилэри түмэ тардар, саҥа сонун идеяларын олоххо киллэрэр, бэрт интэриэһинэй буолуохтааҕын өйдүүллэр. Кандидаттар сонун идеяларын, тугу тэрийиэхтэрин баҕаралларын, бырагыраамаларын билиһиннэрдилэр.
Бу иннинэ лидеринэн оскуолабыт выпускнига Александр Пахомов салайар кэмигэр бэрт үчүгэй санааны оскуола үөрэнээччилэригэр хаалларбытын туһунан оҕолор санааларын эттилэр.
Саша бэрт сонун идеялардаах, эрчимнээх, оҕолору түмэ тардар лидербит этэ. Улахан кылаас уолаттара иллээх, эйэлээх, доҕордуу буоларбытын көҕүлээччибит. Саша төһө даҕаны үөрэххэ киирдэр, билигин даҕаны оскуола олоҕун кытта сибээһин быспат, — диэн Любомир Лукин санаатын үллэстэр.
Бу курдук оскуолабыт үөрэнээччилэрэ бу эппиэтинэстээх дуоһунаска тахсар саҥа лидертэн элбэҕи күүтэллэр, эрэнэллэр.
- Христина СКРЯБИНА,
- «Амма олоҕо» хаһыат уопсастыбаннай кэрэспэдьиэнэ, оскуола педагог-бибилэтиэкэрэ.