Амма Наахара нэһилиэгэр быйыл үһүс сылын улуустааҕы «Ситим» кырдьаҕастар лааҕырдара үлэлээтэ. Лааҕыры Амма улууһун бэтэрээннэрин Сэбиэтин бэрэссэдээтэлэ Мария Захарова тэрийэн аҕам саастаах дьоммут үөрүүлэрэ үгүс. Бу күннэргэ лааҕыр уочараттаах сезонун түмүктээтэ.
Лааҕыры уопуттаах салайааччы, үлэни көдьүүстээхтик тэрийээччи Полина Кононова салайар. Лааҕыр Үлэ Дьоруойа П.И.Яковлев аатынан Амма Наахара орто оскуолатын мастарыскыайыгар тэриллэр. Биир күн «Ситимҥэ» сылдьыы үйэ-саас умнуллубат түгэннэри бэлэхтээһин буолар. Манна Саха сирин араас муннуктарыттан кэлэн сынньанан, Амма кэрэ айылҕатын кытары алтыһан бараллар. Сынньанааччылар доруобуйаларын нэһилиэк бэтэрээннэрин сэбиэтин бэрэссэдээтэлэ, медик идэлээх Марианна Чен көрдө, минньигэс аһынан повар Наталья Трофимова, повар көмөлөһөөччүтүнэн Галина Григорьева толору хааччыйдылар, лааҕырга ырааһы Ульяна Пахомова, Мария Ефремова көрөннөр аҕам саастаах дьонтон махтал тыллары иһиттилэр.
Быйыл Сулҕаччыттан Иван Михайлович Максимов кэлэн лааҕырга бастакытын сынньанна. Ону сэргэ Амма Наахараттан үлэ бэтэрээннэрэ Матрена Михайловна Нерлова, Августина Николаевна Шестакова, биир дойдулаахтарбыт Амматтан спорт бэтэрээнэ Алексей Николаевич Матвеев, Дьокуускай куораттан Тамара Ильинична, Николай Николаевич Литвинцевтар, Бөтүҥтэн педагогическай үлэ бэтэрээнэ Ольга Петровна Егорова, Соморсунтан бэтэрээннэр сэбиэттэрин бэрэсэдээтэлэ Полина Харитоновна Нестерева, Мэҥэ Хаҥаластан Анастасия Харитоновна Васильева, Болугуртан Мария Васильевна Софронова, Иван Иванович Давыдов, Амматтан Зоя Егоровна Окорокова, Ева Прокопьевна Борисова, Алтантан улууска, өрөспүүбүлүкэҕэ «Моя трудовая молодость» бырайыак салайааччылара Наталья Васильевна Борисова, Римма Николаевна Дьячковская, Сунтаартан төрүттээх Индияҕа 11 сылын олорон тибет массаһыгар үөрэнэр, ортопед быраас Полина Ивановна Иванова сынньаннылар.
«Уон күннээх ылыммыт былааммыт туолла. Сынньанааччылары Биэлимэҕэ сардааналаах хонуутугар, Тоҥолох хайатыгар илдьэ сылдьан айылҕа кэрэтин көрдөрдүбүт, хаартыскаҕа түстүбүт. Мотористарынан олохтоох дьоммут Николай, Леонид Мартыновтар үһүс сылын, Захар Александров иккис, Александр Григорьев бастакы сылларын тастылар. Арыы алааска тиийэн боҕоруоскай от хомуйдубут, Үлэ Дьоруойа Петр Ионович Яковлев олорбут, үлэ күөстүү оргуйбут сайылыгар сырыттыбыт, «Дыгын Дархан» историческай киинэ уһуллубут сиригэр икки төгүл экскурсия буолла. Маны тэҥэ Петр Ионович Яковлев аатынан оскуола түмэлин көрдөрдүбүт, нэһилиэк ааспыт олоҕун, билигин тугунан тыынарын билистилэр. Биһиэхэ сыл ахсын тарбаҕар талааннаах Лариса Ивановна Унарова кэлэн дьарык ыытар. Быйыл сынньанааччылар сардаана сибэкки оҥорон бэлэх тутан бардылар.
Нина Романовна Гаврильева хаамыскаҕа, хабылыкка маастар кылаас ыытан төрүт остуол оонньуутун тула барыбытын түмтэ. Олохтоох бибилэтиэкэ салайааччыта Екатерина Унарова сынньанааччыларга кинигэ, сурунаал уларсан аахтарбыта эмиэ хайҕабыллаах. Болугуртан «Wieda» компания лидера Александра Чирикова аһылык таһынан эбии доруобуйаҕа туһалаах битэмииннэр, саҥа БЭД массаһын туһунан билиһиннэрэн кэпсээтэ. Маны сэргэ Сунтаартан төрүттээх ортопед-врач Полина Иванова кэлэн сынньанан, таарыччы эмтээн, эт-хаан дьарыктарынан улахан үлэни ыытта. Сахалыы куттаах Туяра Мартынова өрүү биһиги тэрээһиннэрбитигэр күүс-көмө буолар. Сынньанааччылар 75-с миэстэлээх саҥа таас уһуйааҥҥа сылдьан көрөн астыннылар. Быйыл Мария Васильевна 14 куһу, сибиэһэй сүөгэй, творог, быырпах, онтон нэһилиэк баһылыга Захар Семёнович сибиэһэй балыгынан күндүлээннэр сынньанааччылар дуоһуйа аһаатылар. Маны сэргэ олохтоох дьаһалта баһылыкпыт Захар Александров өйөөһүнүнэн үһүс сылын Өнньүөс бэтэрээннэригэр 10000 солкуобай спонсордаан аҕам саастаах дьоммут үөрүүлэрэ улахан. Биһиги үөрэрбит диэн «Ситимҥэ» иккис, үһүс сылын дьоммут сынньана кэлэллэрэ буолар» — диэн лааҕыр салайааччыта Полина Петровна үлэтин билиһиннэрдэ.
Бу лааҕырга иккис төгүлүн сынньанар биир дойдулаахтарбыт Дьокуускай куорат олохтоохторо, Өнньүөс бочуоттаах олохтооҕо Тамара Ильинична уонна кини кэргэнэ, сахалыы куттаах, айар талааннаах Николай Николаевич Литвинцевтар сырыттылар.
«Бу лааҕыр биһиги көлүөнэ дьонугар-сэргэтигэр улахан болҕомто уурар. Биһиги манна билсиһэ, сылаас сыһыаҥҥа сыста, сэргэхтик сэһэргэһэн, ис сүрэхтэн үөрэ-көтө сынньанабыт. Биһиги лааҕырбыт чэчирээн чэлгийэн истин, сайда салалла турдун! Кэргэним Николай быйылгы сынньалаҥ туһунан астынан туран хоһоон хоһуйда”, — диэн Тамара Ильинична санаатын үллэһиннэ.
Салгыы Николай Литвинцев хоһоонун билсиэҕиҥ
Өнньүөскэ.
Өлүөнэ Эбэни туораары
Өр күүтэн паромҥа киирдибит,
Биир чаастан ордук айаннаан
Бэстээхпит биэрэгин буллубут.
Дьэ мантан айаммыт кытаанах
Кэлэбит элэйэр ыраахтан
Сырыыны сылдьыбыт бадахтаах
Суоппарбыт этэҥҥэ тиэрдиэҕэ.
Кыыс Амма кэрэтин сөбүлээн
Ыраахтан, чугастан лааҕырга
Кэлбиттэр эбээлэр, эһээлэр
Кэпсэтии, сэлэһии тэнийэр.
Уон араас тэрээһин ыытыллар
Остуол да оонньуута тардыллар
Онно дьэ кыттыһан иһэбит
Оҕолуу үөрэбит, көтөбүт.
Ол сылдьан сааспытын умнаммыт
Баарбытын-суохпутун тэбиибит
Сатаабат даҕаны буолларбыт
Ыллыыбыт, хоһоон да ааҕабыт.
Уол оҕо, кыыс оҕо буоламмыт
Бары да Эбэҕэ киирэммит
Ыраас, сылаас ууга умсаахтаан
Күүс, күдэх эбиниэх тустаахпыт.
Кыргыттар, дьэ астык кыргыттар!
Сахалыы ас арааһын тардаллар
Улахан тэриэлкэ толору
Барыта сөбүлүүр астарбыт.
Өлөксөй көмөтө улахан
Үөрүүнэн барытын толорор
Ыраахтан саҥата иһиллэр
Көрдөөх тылынан күллэрэр.
Үөрэ-көтө кэлэллэр эбит
Үлэ үөһүгэр сылдьыбыт
Олоҕу үлэнэн киэргэппит
Дьиҥ дьон бастыҥа, мааныта.
Сүһүөхтээх бэйэбит сүгүрүйэн
Хоолдьохтоох бэйэбит хоҥкуйан
Салайар, тэрийэр дьоннорго
Махтал киэнэ маанытын аныыбыт.
Лааҕыр сабыллыытын иккис сылын Александр Захаров иилээн-салайан ыытта. Нэһилиэк Аҕа баһылыга Захар Александров, Амма улууһун кырдьаҕастарын бэрэсэдээтэлэ Мария Захарова, лааҕыр салайааччыта Полина Кононова эҕэрдэ тыллара, бэлэхтэрэ туттарылыннылар, минньигэс астаах сандалы тардылынна, хамаанданан эҕэрдэ күрэх ыытылынна. «Эһиил баччаҕа көрсүөхпүт! Орто дойдуга олох олоруу чорооно куруутун Эһигини дьолунан толоро турдун, Аан дойду ачата куруук Эһиэхэ аралыйдын, үрүҥ Күн үтүөтэ Эһиэхэ үөрүүнү эрэ бэлэхтээтин! — диэн салайааччылар баҕа санааларын тириэртилэр.
Ирина КОРЯКИНА-ОЛЕСОВА