Амматааҕы Н.С. Захаров – Сахаачча аатынан оҕо спортивнай оскуолатын көҥүл тустууга салаатын алта иитиллээччитэ ыраах Дагестан өрөспүүбүлүкэтигэр тиийэн эрчиллиини бара сылдьаллар. Тренердэр оҕолор маннык дьарыктарга сылдьан элбэххэ үөрэнэллэр, маастарыстыбаларын сайыннараллар диэн этэллэр. Дагестаҥҥа эдэр тустууктары спортивнай оскуола тренерэ Сырдык Айылгын Бойуот уола илдьэ сылдьар.
“Биһиги Дагестан өрөспүүбүлүкэтин Махачкала куоратыгар кэлэн эрчиллиини бара сылдьабыт. Кэлбиппит икки нэдиэлэ буолла. Ол кэм устатыгар икки күрэхтэһиигэ кытынныбыт. Бастаан Чечня өрөспүүбүлүкэтин Грознай куоратыгар ыытыллыбыт күрэхтэһиигэ кыттыбыппыт. Ол кэнниттэн Махачкала куоракка кэлэн күрэхтэстибит. Күрэхтэһиилэргэ Дагестан элбэх спортивнай оскуолаларын иитиллээччилэрэ кэлэн кытыннылар. Оҕолорбут бэртээхэй киирсиилэри көрдөрдүлэр. Манна Попов Дамир 31 киилэҕэ бэһис, Потапов Еремей 35 киилэҕэ эмиэ бэһис, онтон 52 киилэҕэ Швецов Аристарх 8 : 12 очукуонан кыайан үһүс миэстэ буолла уонна 57 киилэҕэ Святослав Окороков утарылаһааччытын туше быраҕан ыраас кыайыыны ситиһэн эмиэ бириистээх үһүс миэстэҕэ таҕыста.
Дьарыкпыт салҕанар. Салгыы өссө Арассыыйа түһүлгэтигэр, онтон эмиэ Махачкалаҕа ыытыллар аһаҕас күрэхтэһиигэ кыттыахпыт. Маннык ыраах кэлэн эрчиллиини барар сүрүн сорукпут диэн оҕолор маастарыстыбаларын үрдэтии, кэлэр сылга Арассыыйа таһымыгар ситиһиилээхтик тусталларыгар бэлэмнээһин, уопут атастаһыыта, оҕолору сайыннарыы буолар. Онон эрчиллиилэри сэргэ ыытыллар күрэхтэргэ кыттарбыт биһиэхэ уопут биэрэр, туһата элбэх”, — диэн этэр Сырдык Айылгын Бойуот уола.
“Амма олоҕо” хаһыат