Т.С. Лукин аатынан Сатаҕайдааҕы модельнай бибилэтиэкэ-музей дьиэтигэр “Киистэ кэрэ эйгэтигэр” диэн кинигэ сүрэхтэниитэ буолла. Кинигэни СӨ култууратын үтүөлээх үлэһитэ, “Гражданскай килбиэн” анал бэлиэ хаһаайына, Сатаҕай нэһилиэгин бочуоттаах олохтооҕо Анна Андреева хомуйан оҥорбут.
Кинигэҕэ Россия наукатын академиятын Сибиирдээҕи салаатын үтүөлээх үлэһитэ, худуоһунньук, самодеятельнай ырыаһыт Адамов Дмитрий Андреевич оҕо сааһын умнубат түгэннэрин уонна үлэтин туһунан ахтыыта, аймахтарын, үөлээннээхтэрин истиҥ иһирэх тылларынан бэлиэтээһиннэрэ киирбиттэр. Барыта 6 түһүмэхтээх. Бастакы түһүмэххэ олоҕун сэһэнэ, иккискэ чугас дьоннорун сырдык санааларынан ахтыылара, үһүскэ олоҕун хатыламмат түгэннэрэ, төрдүс түһүмэххэ уруһуйдара киирбиттэр, бэһис түһүмэххэ хаһыат балаһаларыттан бэлиэтээһиннэр, алтыска айар үлэтин бэлиэтиир үктэллэрэ кэккэлэспиттэр.
Кинигэ сүрэхтэниитигэр бэтэрээн учуутал Анастасия Николаевна Лукина уонна Любовь Романовна Гурьева истиҥ иһирэх ахтыылары оҥордулар. Бу орто дойдуга айылҕаттан дьоҕурдаах, олус талааннаах, киһи киһитэ олорон ааспыт олоҕун, дойду историятын хартыынаҕа киистэнэн түһэрбит талааннаах худуоһунньук туһунан бэрт үчүгэй кэпсэтии буолла. Бу үтүө киһи туһунан кинигэ сүрэхтэниитигэр сылдьаммыт кинигэ уонна худуоһунньук хартыыналарын бэлэх тутаммыт үөрэн-көтөн тарҕастыбыт.
“Дмитрий Андреевич олоҕо уустук этэ, оҕо эрдэҕиттэн оҕолору кытта тэҥҥэ оонньообокко, атаҕынан инбэлиит буолан эрэйдээхтик улааппыта. Ону күнү көрдөрбүт күндү киһитэ ийэтин ыраас, истиҥ сыһыана, соҕотох оҕотугар иҥэрбит таптала киһи оҥорбута. Дима киһи буолан тахсыытыгар инбэлиит буолан дьонтон итэҕэс санаммакка, күүстээх санаатынан, айылҕаттан бэриллибит талаанын сөпкө сайыннаран, олоххо бэйэтин миэстэтин булан, үөрэнэн, үлэлээн ааспыта, бу эмиэ ураты дьылҕа. Онтон саха норуотугар “Суруллубут суоруллубат” диэн бэргэн этии баар. Биһиги Дмитрий Андреевич Адамов туһунан суруйбут ахтыыларбыт кини аатын үйэтитэ туруохтара”, — диэн санаатын Анна Андреева үллэһиннэ.
Христина СКРЯБИНА