Амма нэһилиэгэр “Фаворит” бильярдыыр кулуупка Мэҥэ Хаҥалас улууһун Төхтүр нэһилиэгиттэн кэлэн Амма нэһилиэгин хамаандатын кытта көрсөн бэрт сытыы киирсиилэр буолан аастылар. Хамаандалар иккиэн тэҥ баайыылаахтарын көрдөрдүлэр.
Күрэхтэһии үтүө үгэскэ кубулуйан бильярд спордун сэҥээрээччилэр бу курдук сыллата көрсөллөр, бастыҥы быһаарсаллар. Ол курдук 12-лии киһилээх хамаанда үс көрүҥҥэ көрсөн, уопсай очкону таһааран бу көрсүһүүгэ кимнээх бастыылларын быһаарыстылар.
Күрэх саастарынан биэс бөлөххө арахсан барда. Ол курдук 50 саастарыгар диэри үстүү, 50-тан 60-гар диэри түөртүү, 65 саастарыттан үөһээ иккилии уонна 70 -тан үөһээ биирдии киһи хамаанда аайыттан көрүстүлэр. “Фаворит” бильярдыыр кулууп салайааччыта Григорий Аммосов быһаарбытынан аан бастаан “свободная пирамида” көрүҥэ оонньоонно. Манна биирдии паараҕа 40-нуу мүнүүтэ бэриллэр. Оонньуу иннинэ пааралар сэрэбиэйдээн ким кимиэхэ түһэрсэрин быһаарсаллар. Манна 12 паара оонньоон аммалар 176, төхтүрдэр 173 шаригы киллэрдилэр. Онон 3 шарынан чорбойон тахсыбыта. Саамай элбэх, 8 шаригы хамаандатыгар Амматтан Петр Гермогенов, төхтүрдэргэ 6 шаригы Иван Васильев аҕаллылар. “Динамичнай пирамида” көрүҥэр аммалар 123, төхтүрдэр 122 шаригы киллэрэн олохтоохтор эмиэ чорбойдулар. Бу көрүҥҥэ саамай элбэх, 11 шаригы Амматтан Михаил Неустроев, Төхтүртэн Василий Борисов эмиэ 11 шары киллэрдилэр. Үһүс көрүҥ “комбинированнай пирамида” түмүктүүр көрүҥ буолла. Манна аммалар 111 шары, ыалдьыттар 119 шары киллэрэн, 8 шарынан баһыйа туттулар. Амматтан саамай элбэх 9 шары Афанасий Нестерев, Төхтүртэн Иван Васильев 11 шары киллэрэн, икки көрүҥҥэ хамаандатыгар олус наадалаах шардары аҕалла. Онон үс көрүҥ түмүгүнэн төхтүрдэр 414 шары, аммалар 410 шары киллэрэн, ыалдьыттар 4 шарынан чорбойон кыайыылаах тахсан үөрэн-көтөн бардылар.
“Төхтүр нэһилиэгэр бильярдынан утумнаахтык дьарыктаналлар. Нэһилиэктэригэр үс улахан остуоллаахтар. Онон күрэхтэһиилэр тиһигин быспакка бараллар. Маны сэргэ Дьокуускайтан чугас сытар буолан, онно ыытыллар бары күрэхтэһиилэргэ куруутун кэриэтэ кытталлар. Онон күүстээхтэр диэн этиэххэ наада. Онон бу күрэхтэһиигэ биһиги олох күүскэ хотторботубут, тэҥ баайыылаахпытын көрдөрдүбүт диэххэ наада. Уолаттар “комбинированнай пирамидаҕа” олус ыксаабакка, отыгрыш оонньоммута буоллар, баҕар түмүк атын буолуо этэ диэн сыыһаларын билиннилэр. Ол үчүгэй. Күрэххэ кыттыбыт бары дьоммутугар улуустарын, нэһилиэктэрин аатын түһэн биэрбэккэ көхтөөхтүк кыттыбыттарыгар махтанабын”, — диэн кулууп салайааччыта Григорий Григорьевич санаатын үллэстэр.
Кыайыылаах хамаанда чилиэннэрэ бары мэтээллэринэн, дипломнарынан наҕараадаланнылар. Ону сэргэ хамаандаларыгар элбэх шары киллэрбит уолаттар эмиэ бэлиэтэнэн харчынан бириэмийэлэри туттулар. Онтон Төхтүр хамаандатын хапытаана Степан Кычкин Бочуотунай грамотанан наҕараадаланна.
“Амма олоҕо” хаһыат