Амматааҕы «Кэнчээри» уһуйааҥҥа Олоҥхо декадатын чэрчитинэн «Саллар саас тухары олоххо – саханы үрдэтиэ олоҥхо» диэн Олоҥхо декадатын үөрүүлээх арыллыытын тэрээһинэ буолан ааста.
Тэрээһини уһуйааммыт музыкальнай салайааччыта Мира Харитонова иилээн-саҕалаан ыытта. Уһуйаан салайааччыта Галина Лугинова алгыстаан арыйда. Бу кэннэ оҕолор олоҥхо туһунан кылгас ойуулуктары көрдүлэр. Салгыы уһуйаан үлэһиттэрэ Прокопий Ядрихинскай — Бэдьээлэ «Дьырыбына Дьырылыатта» олоҥхотун дьоруойдара буолан оҕолор иннилэригэр таҕыстылар. Ол курдук Арылы Тойон оҕонньор — Афанасий Марин, Кэрэмэс Хотун — Анжела Жиркова, кинилэр уоллара Тойон Дьоллуут — Вячеслав Михайлов, кыыстара Дьырыбына Дьырылыатта — Юнона Васильева, Айыы Умсуур Удаҕан — Туйаара Романова, Анды Баалыыр Тойон уонна Чөркөй Өтүмэх эмээхсин кыыстара Сыралыма Куо — Ольга Софронова, Аан Алахчын Хотун — Анна Кузнецова, Сорук Боллур — Василий Чикальдин, Абааһы кыыһа — Зоя Осипова буолан оруолларын олус бэркэ оонньоон, кырачаан көрөөчүлэрбит сөҕүү-махтайыы бөҕө буоллулар. Сорох кырачааннар абааһы кыыһыттан куттанан ытааһыннаах да буолла. Түмүккэ оҕолорго Олоҥхо туһунан билиилэригэр викторина буолла.Тэрээһин олус сэргэхтик ааста. Иитиллээчилэрбит Олоҥхо туһунан билиилэрэ өссө хаҥаабыта буолуо диэн бүк эрэллээхпит.
Юнона ВАСИЛЬЕВА,
«Кэнчээри» ОСК сэбиэдиссэйи иитии-үөрэтии өртүгэр солбуйааччы