Чакыр орто оскуолатыгар үгэскэ кубулуйбут үөрэх бастыҥнарын чиэстээтилэр. Быйыл тэрээһин 19 үйэҕэ буолар баал тиэмэтинэн ыытыллан ураты сэргэх. Оскуолабыт 65 үөрэнээччиттэн 30 оҕо «үчүгэй», 5 оҕо «туйгун» сыанаҕа үөрэнэллэр. Бу оҕолор бары, араас таһымнаах дакылааттарга, олимпиадаларга, онтон да атын тэрээһиннэргэ ситиһиилэрдээхтэр, чинчийэр үлэлэринэн дьарыктаналлар. Хас сылын ахсын бу тэрээһини учууталларбыт олус сэргэхтик, интэриэһинэйдик тэрийэн ыыталлар.
Быйыл 19 үйэ саҕанааҕы баал тиэмэтинэн буолла. Оҕолор бары ол кэмҥэ сөп түбэһэр таҥас таҥнан, киэргэнэн, оҥостон кэлбиттэр. Төрөппүттэр уонна учууталлар остуоллары киэргэтэн, ас арааһын астаан бэлэмнээбиттэр. Үөрүүлээх түгэммит саҕаланыыта оҕолору оскуолабыт дириэктэрэ Марфа Семеновна Прокопьева эҕэрдэлээтэ. Онтон төгүрүк «5» сыанаҕа үөрэнэр туйгун үөрэнээччилэр — Шадрина Арина, Алексеев Альберт, Ефремова Сайаана, Бессонова Анисья уонна Гоголева Виктория куруутун саныы сылдьарга, үөрэххэ ситиһиилэрин туоһулуур өйдөбүнньүк статуетка туттулар.
Ону таһынан минньигэс туорт чүмэчитин үрэн, куһуоктарга быһар чиэскэ тигистилэр. Учууталлар бары билэр «Красавица и Чудовище» мультиктан быһа тардан оонньоон көрдөрдүлэр. Ону тэҥэ үөрэнээччилэр вальс, оччотооҕу кэм үҥкүүтүн толорон тэрээһини өссө киэргэттилэр, ону таһынан араас өйү-билиини тургутар, хамсаныылаах, көрдөөх оонньуулары оонньоон астыннылар.
Быйылгы үөрэх дьылыгар өссө үчүгэй, туйгун үөрэнээччилэр эбиллэн, өссө биир умнуллубат түгэн буоларын кэтэһэ хаалабыт уонна бу умнуллубат сэргэх тэрээһини тэрийэн ыыппыт учууталларбытыгар, төрөппүттэрбитигэр улахан махталбытын тиэрдэбит.
Анисья БЕССОНОВА,
Чакыр орто оскуолатын «Сарыал» медиакиин эдкорра