Үөрэх салалтатын иһинэн үлэлиир уйулҕа, педагогика, мэдиссиинэ уонна социальнай көмө Амматааҕы киинин көҕүлээһининэн (салайааччы Марина Тарабукина) педагог психолог Светлана Цветкова улуус оскуолаларын кылаас салайааччыларыгар тыл тылга киирсибэт буолуу төрүттэригэр анаммыт тус бэйэтин сэминээрин сэргэхтик ыытта. Уопуттаах уйулҕаһыт педагогтарга кыра атааннаһыы саҕаланар түгэннэрин, түһүмэхтэрин, аналларын, уруокка үөрэнээччилэр бэрээдэги кэһиилэрин төрүөттэрин уоннаучуутал бэйэтин салайыныытын, үөскээбит балаһыанньаны оҕо бэйэтэ быһаарарыгар хайдах көмөлөһөр туһунан сүбэлэрин биэрдэ. Түмүккэ сэминээр кыттыылаахтара өрөспүүбүлүкэтээҕи киин сэртипикээттэрин туттулар.
«Кылаас салайааччыта педагогикаҕа тыл тылга киирсибэт буолууга боппуруоһу таба быһаарыахтаах саамай тутаах киһи буолар. Кини ону бэйэтэ хайдах быһаарарыттан буолбакка, оҕолору бэйэлэрин хайдах бу балаһыанньаттан тахсарга сөптөөхтүк, табатык үөрэтэриттэн улахан тутулуктаах. Сэминээрбит уратыта лиэксийэ буолбакка оонньууларынан, трениннэринэн уонна кылаас салайаааччылара оҕолоругар итини судургутук тириэрдэллэрин курдук баар матырыйаалбыт барыта ойууларынан бэриллэр. Олоххо, дьиэ кэргэҥҥэ, оскуолаҕа, кылааска оҕо кимтэн эрэ хомойоро, хоргутара, күнүүлүүрэ араас барыта баар. Бүгүн учууталларга туһалаах буоллун диэн бэйэм хомуйбут матырыйааларбын түмэн сүбэлэрбин биэрдим. Урут психологтарга, өрөспүүбүлүкэтээҕи да таһымнаах сэминээри ыыта сылдьыбыт уопуттаах буоламмын матырыйаалларбар, методикаҕа босуобуйабар олоҕуран бу матырыйаалларым туһалаатыннар диэн өссө киэҥ эйгэҕэ тарҕатан, чуолаан, оҕо аймаҕы кытта ыкса үлэлэһэ, күннэтэ алтыһа сылдьар кылаас салайааччыларга ыыттым. Төрөппүт мунньахтарыгар бу тиэмэбинэн, ойууларбынан эмиэ элбэхтик кыттабын. Аҥаардас биир ойууттан биир улахан тиэмэ үөскээн тахсар уонна бу туһунан олус элбэҕи кэпсэтиэххэ, үөрэтиэххэ, бэл бүтүн мунньаҕы да ыытыахха сөп. Тэйиччиттэн олорон ыытар аныгы ньымалары, көрдөрөр-иһитиннэрэр матырыйааллары туһанабын, ол эрээри хас биирдии кыттааччым барытын бэйэтин нөҥүө аһардарын курдук сирэй көрсөн, атах тэпсэн олорон кэпсэтэрбин ордоробун, ол ордук көдьүүстээх буолар. Бу ойуулары туһанан ханнык баҕарар тиэмэҕэ ырытыһан, оонньоон, холонон көрөн ханнык баҕарар кэпсэтиини таһаарыахха сөп, онон ким ыҥырарынан көмө буолуохпун сөп,» – диэн Светлана Леонидовна санаатын үллэстэр.
Алтана АРТЕМЬЕВА