Дьокуускай куоракка кадеттар өрөспүүбүлүкэтээҕи оскуолаларыгар үөрэнээччилэрин хамаандаларын икки ардыларыгар ыытыллыбыт XXVI Өрөспүүбүлүкэтээҕи «Снежный барс» байыаннай оонньууга Амма улууһун юнармеецтара бастакы, Чурапчы иккис, Мэҥэ Хаҥалас үһүс миэстэ буоллулар. Оонньуу Улуу Кыайыы 80 сылыгар, Аҕа дойдуну көмүскээччилэр сылларыгар ананна. Олоххо куттал суох буолуутугар уонна Ийэ дойдуну көмүскүүргэ үөрэтэр учууталлар Амма 1 № -дээх орто оскуолатын «Эрэл» байыаннай уонна успуорт кулуубун салайааччыта Дмитрий Петухов уонна Амма 2 № -дээх орто оскуолатын «Молот» байыаннай-спортивнай кулууп салайааччыта Семен Килбясов улуус хамаандатын бэлэмнээтилэр.
«Барыта 12 хамаанда иһигэр киин улуустары таһынан Муома, Ньурба, Үөһээ Бүлүү, Бүлүү улуустара кытыннылар. Хамаандаҕа 8 уол уонна 2 кыыс бастыҥ буолар иһин бары кыахтарын, сыраларын уурдулар. Уолаттар устуоруйаны билиигэ, байыаннай хаамыыга, АК-74 аптамааты ыһыыга уонна хомуйууга, аптамаат маҕаһыынын иитиигэ, сыал ытыытыгар, эт — хаан өттүнэн бэлэм буолууну, байыаннай эстафетаҕа төһө бэлэмнээхтэрин көрдөрдүлэр. Бу тэрээһин үүнэр ыччаты төрөөбүт дойдуну таптыырыгар, дойдуга бэриниилээх буоларыгар уонна көмүскүүргэ бэлэм буоларыгар улахан тирэх буолар,» — диэн санаатын үллэстэр үөрэх салалтатын байыаннай-патриотическай кулууптар куратордара, «Юнармия» улуустааҕы хамсааһынын салайааччыта, анал байыаннай дьайыы кыттыылааҕа Роман Филатов.
Алтана АРТЕМЬЕВА.