Кулун тутар 16 күнүттэн С.Н. Донской — II аатынан үөрэҕи сайыннарар уонна идэни үрдэтэр институт, «Оҕо саас илдьиттэрэ» өрөспүүбүлүкэтээҕи тирэх киин уонна Чурапчы үөрэҕин салалтатын дэлэгээссийэтэ Таатта-Чурапчы-Амма – Мэҥэ Хаҥалас — Уус Алдан хайысханан Саарыннар үөрэхтэрин тарҕатар иитии эйгэтинэн айанныы сылдьаллар. Улахан айан Ытык Тааттаттан Хадаайыттан Улуу Өксөкүлээх Өлөксөй төрөөбүт балаҕаныгар кини сиэнэ Рива Реасовна Кулаковскай уоту уматта. Бу бэлиэ түгэни өрөспүүбүлүкэ араас муннугуттан, ол иһигэр Амма үөрэҕин салалатата, педагогтар уонна оҕолор куйаар ситиминэн кыттыстылар. Педагогтар десаннара Амма сиригэр кулун тутар 18 күнүгэр ыалдьыттаата.
Көрсүһүү Чапчылҕан оскуолатыттан, өрөспүүбүлүкэҕэ биллэр «Уус кыһатыттан» саҕаланна. Сүрүн көрсүһүү Амма 1№-дээх орто оскуолатыгар ыытылынна. Үөрэх институтун иитэр үлэҕэ хаапыдаратын сэбиэдиссэйэ Сардана Третьякова оҕону иитиигэ духуобунай култуураны, сиэрдээх буолууну сайыннарыыга болҕомтотун уурарга сүбэлэрин биэрдэ, Амма улууһун оскуолаларын бастыҥ уопуттарын биһирээтэ уонна дойду бырайыактарыгар кытталларыгар ыҥырда. «Оҕо саас илдьиттэрэ» өрөспүүбүлүкэтээҕи тирэх киин сүрүннүүр эспиэрэ Мария Владимирова өрөпүбүлүкэтээҕи бырайыактары уонна бырагыраамалары олоххо киллэриигэ үлэ күүһүрэн иһиэхтээҕин бэлиэтээтэ, дойдуга ыытыллар көрүүлэргэ, күрэстэргэ көхтөөхтүк киирсэн иһэллэригэр эттэ. Өрөспүүбүлүкэҕэ дириэктэрдэр сүбэһиттэрин сүрүннүүр Виктория Олесова «Дьоһуннааҕы кэпсэтиини» үөрэтиигэ Саха сирин, улуус матырыйаалларын сыһыаран киллэрэргэ сүбэлэрин биэрдэ. Улуус үөрэҕин салалтатын начаалынньыгын солбуйааччы Акулина Иванова улууспутугар үөрэхтээһиҥҥэ кылааттарын киллэрбит сырдатааччыларбытын үйэтитэргэ үлэ ыытылларын кэпсээтэ, иитэр үлэҕэ уонна эбии үөрэхтээһиҥҥэ начаалынньык Нюргуяна Евсеева улуус иитэр үлэтин билиһиннэрдэ, ыытыллар үлэни-хамнаһы сырдатар, киэҥ эйгэҕэ таһаарар сөптөөҕүн эттэ.
Улуус оскуолалара бастыҥ уопуттарын үллэстиилэрэ суолталаах буолла. Ол курдук Амма 1№-дээх орто оскуолата партиотическай иитиигэ анал байыаннай дьайыыга кылаас үлэтин, кыраайы үөрэтиигэ бырайыктарын, төрөппүтү кытта үлэни, олоҥхону үҥкүүнэн туруорууну, Амма 2№-дээх орто оскуолата улууспут үөрэхтээһиҥҥэ бастакы сырдатааччыларын, оскуолатааҕы биисэнэс инкубатор үлэтин, лиссиэй «Космоска көтүү”, Мээндиги орто оскуолата “Эдэр карбышевтар” Бүтүн Арассыыйатааҕы хамсааһыҥҥа кыттар эспэдииссийэтин, Болугур орто оскуолата иитэр хайысхаҕа ыстаап үлэтин, Абаҕа орто оскуолата пионерия хамсааһынын, Эмис оскуолата алааас уонна олоҥхо педагогикатын, Чапчылҕан орто оскуолата устуоруйа кэрэһиттэрин, уус кыһатын, оскуолатааҕы биисэнэс инкубатор ситиһиилэрин мустубут дьоҥҥо билиһиннэрдилэр. Дириэктэри иитэр үлэҕэ солбуйааччылар, сүбэһиттэр, кылаас салайааччылара, педагогтар «Дьоһуннааҕы кэпсэтии» дойду үрдүнэн ыытылла турар үөрэҕи таһынан дьарыкка анаммыт үөрэх института ыыппыт кууруһугар үөрэннилэр, элбэх туһалааҕы бэйэлэригэр ылыннылар. Чурапчыттан сылдьар ыалдьыттарбыт Амма 1№-дээх орто оскуолатын кыраайы үөрэтэр түмэлигэр сылдьан салайааччы Вера Бессонова кэпсээнин сэргээн иһиттилэр, экспонаттары интэриэһиргээн көрдүлэр. Саарыннар үөрэхтэрин, иитэр эйгэни тарҕатар айан салгыы Мэҥэ Хаҥаласка айаннаата.
Алтана Артемьева