Владивосток куоракка буолан ааспыт Уһук Илин экономическай форум чэрчитинэн ыытыллыбыт V үбүлүөйдээх “Уһук Илин аһаҕас кубога” ыытыллыбыта. Манна Уһук Илин иһинэн киирэр регионнары сэргэ Сибиир уобаластара бары кытыннылар. Бу улахан спортивнай тэрээһиҥҥэ биир дойдулаахпыт, Эмистэн төрүттээх Дьокуускай куорат олохтооҕо Дьулус Бубякин ситиһиилээхтик кыттан дойдутун ааттатта.
Бу улахан тэрээһиҥҥэ Дьулус категориятыгар 36 атлет кииристэ Түөрт күн күрэхтэһэн бастыҥтан бастыҥнар хаалан истилэр. Ол курдук барыта 9 көрүҥҥэ кыаххын холоннулар. Манна киирэллэр сүүрүү, харбааһын, турникка тардыныы, штанганы анньыы, быһатын спортсмен туохха бэлэмнээҕин барытын көрдөрөр спорт күүстээх көрүҥнэрэ. Бастакы күн ыытыллыбыт харбааһыҥҥа 25-с, хайыһарга 13-с буолан бастакы күн түмүгүнэн 20-с миэстэ буолар. Ол да буоллар, санаатын түһэрбэккэ, күнтэн күн ыытыллар көрүҥнэргэ киирсэн иһэр. Иккис күҥҥэ гантеллаах комплекска 5-с миэстэ буолан уопсай түмүккэ 13-с кэрдиискэ тахсар. Салгыы штангалаах уонна турникка тардыныылаах комплекска ситиһиилээхтик кытта 11-с миэстэ буолар. Онтон финал аҥарыгар тахсыыга сүүрүүлээх икки комплекска иккиэннэригэр иккис миэстэни ылбыта.
Инньэ гынан финалга киирэн канаттаах, тардыныылаах, ыарахан мээчиги үөһэ быраҕыы уонна штанганы түөскэр таһааран баран үөһээ анньыыга киирсэр. Манна икки комплекска иккиэннэригэр эмиэ иккис миэстэҕэ тахсар уонна уопсай түмүккэ 5-с миэстэ буолан, Сахатын сирин ааттатар.
“Мин бэйэм спорт бу көрүҥнэринэн дьарыктаммытым аҕыйах сыл буолла. Бэйэм өрөспүүбүлүкэ социальнай фондатыгар отдел салайааччытынан үлэлиибин. Кэргэннээхпин, оҕолоохпун. Чөл олоҕу тутуһан, бэйэм күүс өттүнэн сайыннарар спорт көрүҥнэрин талан дьарыктанабын, араас күрэхтэргэ кыттабын. Бу баран кэлиибэр миэхэ күүс-көмө буолбут убайбар Афанасий Афанасьевич Бубякиҥҥа дириҥник махтанабын уонна киниэхэ туох баар бары үчүгэйи баҕарабын”, — диэн Дьулус Бубякин санаатын үллэстэр.
“Амма олоҕо” хаһыат