Амматааҕы Ф. Потапов аатынан норуот айымньытын дьиэтигэр сааланы толору киһи муһунна. Бүгүн бу элбэх оҕолоох дьиэ кэргэттэрэ кэлэн Муона алааска бэриллибит учаастакка уһаайбалара ханан түһүөхтээҕэр нүөмэрдэри таллылар.
“Бу тэрээһини элбэх киһи кэтэстэҕэ. Онон дьэ Саҥа дьыл иннинэ өр сыл кэтэһиилээх элбэх оҕолоохторбутугар дьиэ кэргэттэригэр уһаайбалары түҥэтии тэрээһинин ыыттыбыт. Муона алааска уопсайа 190 уһаайба бэрилиннэ. Билэргит курдук уочаракка дьон 2011 сыллаахтан турар. Онон онтон ыла уочараттаан турааччыларга биэриини саҕалаатыбыт. Амма нэһилиэгин генеральнай былаана биэс сыл устата оҥоһуллан дьэ бүтэн бигэргэтэн быраабыла быһыытынан быһыллан, онон уһаайба бэриллэр кыаҕа баар буолла. Генеральнай былаан эрдэ нэһилиэнньэҕэ тахсан истиллибитэ, элбэх киһи кэлэн көрөн куоластаабыта. Онон бу бэриллэр сирбит 12-с кыбаартал диэн буолар. Манна 200-тэн тахсан уһаайба элбэх оҕолоох, анал байыаннай дьайыыга, инбэлиит оҕолоох дьиэ кэргэннэргэ бэриллэр. Саха өрөспүүбүлүкэтин Бырабыыталыстыбатын дьаһалынан уһаайбаны харчынан толуйуу эмиэ баар этэ. Онно 300000 солк бэриллэн 199 дьиэ кэргэн харчынан ылбыта. Билигин дойдуга үп-харчы кырыымчык буолан ол билиҥҥитэ тохтотуллан турар. Бүгүн сэрэбиэй ыытыллан, боротокуол толоруллунна. Дьэ бу кэнниттэн сири баран көрүөххэ сөп. Онон кэлэр нэдиэлэттэн, сэрэдэ уонна бээтинсэ күннэргэ кэлэн учаастак талбыт ыаллар кэлэн көрүөххэ сөп. Ол көрөн сөбүлэһэр буоллахтарына сайабылыанньа суруллан, уһаайба регистрацияланар, улуус баһылыгын дьаһала тахсар”, — диэн этэр Амма улууһун КУМИ салайааччыта Валентин Петров.
“Амма олоҕо” хаһыат