Ф.Ф. Потапов аатынан норуот айымньытын дьиэтигэр уһуйаан иитиллээччилэригэр Улуу Кыайыы 80 сылынан Арассыыйаҕа уонна Саха сиригэр Ийэ дойдуну көмүскээччилэр сылларыгар аналлаах хоһоон ааҕыытын улуустааҕы күрэхтэһиитэ ыытылынна. Манна уһуйаан иһинэн логопед пууннарыгар дьарыктанар 20 үөрэнээччи Амма, Сэргэ-Бэс, Бөтүҥ, Абаҕа нэһилиэктэриттэн кытыннылар.
Хоһоон ааҕааччылары Амма 1№-дээх оскуолатын логопедтара Лариса Егорова, Раиса Никифорова, психолого-педагогическай киин дефектолога Любовь Борисова сыаналаатылар. Түмүккэ 4-5 саастаах иитиллээччилэргэ 1 миэстэни Виолина Романова («Мичээр» уһуйаан), 2 миэстэни Алина Шамшиева («Хатынчаана» уһуйаан), 3 миэстэни Эрхаан Борисов (Сэргэ-Бэс ), 6-7 саастаах иитиллээччилэргэ 1 миэстэни Юрий Слепцов (Сэргэ-Бэс), 2 миэстэни София Гаврильева («Сардаана» оҕо сайдар киинэ), 3 миэстэни Диана Петрова («Радуга» уһуйаан) ыллылар. Кыайыылаахтар мэтээл, диплом, бары кыттааччылар анал ааттарга тиксэннэр, сэмэй бэлэхтэри тутан үөрэн-көтөн тарҕастылар. Күрэхтэһиини Амматааҕы психолого-педагогическай, медицинскэй киин логопеда Матрена Уварова сатабыллаахтык салайан ыытта.
Хас биирдии оҕо төрөөбүт төрүт тылынан иҥнибэккэ чуолкайдык саҥарыыта төрөппүттэр, иитээччилэр ситимнээх үлэлэрэ буолар. Ол курдук сыллата саҥарар дьоҕурдара кэһиллиилээх оҕолор уһуйааҥҥа тустаах исписэлиистэргэ логопедтарга дьарыктары ааһаллар. Бу үлэ түмүгэ көстөрүгэр биир көрүҥүнэн оҕолор уһуйаан саҕаттан элбэхтик араас күрэстэргэ кыттан бэйэлэрин сайыннарыылара буолар. Онон инникитин оҕолору кытта өссө күүскэ дьарыктанан үгүс ситиһиилэр кэлэллэригэр эрэнэбит.
Марина Тарабукина.