Н.Е. Иванов аатынан Бөтүҥ орто оскуолатыгар бэлиэ түгэн буолан ааста. Биир дойдулаахпыт, психолог-реабилитолог Тамара Егорова Кыайыы 80 сылынан таһаарбыт открыткаларын кэмпилиэгин сүрэхтээтэ.
Бөтүҥ нэһилиэгин бочуоттаах олохтооҕо, психолог-реабилитолог, Дьокуускай куоракка “Бөтүҥ” түмсүү салайааччыта Тамара Егорова Улуу Кыайыы 80 сылыгар анаан таһаарбыт үлэтин билиһиннэрдэ. Ол курдук Тамара Петровна төрөөбүт дойдутугар олорон, үлэлээн ааспыт тумус туттар, ытыктыыр дьоммут үтүө аатын үйэтитэн, кэлэр кэнчээри ыччакка анаан аныгы олох тэтиминэн кинилэри өҥнөөх открыткаҕа тилиннэрэн, суруктаан-бичиктээн бэчээттэтэн таһаарбытын дьонугар-сэргэтигэр сүрэхтээтэ. Бу дьоро күн ыалдьыттарынан отставкаҕа олорор полиция полковнига Лена Иванова, Арассыыйа эмчиттэрин конфедерациятын Саха сиринээҕи салаатын бэрэссэдээтэлэ, «Мега» волонтер -эмчиттэр түмсүүлэрин салайааччыта, алгысчыт, норуот эмчитэ. норуодунай медиссиинэ туйгуна, Бөтүҥтэн төрүттээх Вероника Семенова — Хомусчаана уонна илбийэр, эмтиир анал байыаннай дьайыы кыттыылаахтарын көрөр-истэр «Мега» киин үлэһитэ, эмиэ Бөтүҥтэн төрүттээх Александра Чирикова кыттыыны ыллылар.
Кэлбит дьон бэркэ сэргээн, көрөн-истэн, санаалара көнньүөрэн, аймах-дьонун, төрөппүттэрин, урукку «Чапаев» холкуос бэрэссэдээтэлэ Нестерев Михаил Тимофеевиһы көрөн, астынан, махтал тылларын эттилэр. Ол курдук открытка кэмпилиэгэр Үлэ Геройа Анна Васильева -Сэбиэт Аана, кини дьиэ кэргэнэ, Аҕа дойду иннигэр үтүөлэрин иһин IV степеннээх уордьан кавалера, чулуу ыанньыксыт Аграфена Сутакова, «Гордость Якутии» норуот бириэмийэтин лауреата, травматолог быраас Степан Тордуин уонна да атын биллиилээх биир дойдулаахтарбыт киирбиттэр. Көрүсһүүгэ Тамара Петровна социальнай эйгэ бастыҥ үлэһиттэрин сырдатар энциклопедия тахсыбытын иһитиннэрдэ уонна үөрүүлээх быһыыга-майгыга Бөтүҥ нэһилиэгин социальнай боппуруоска баһылыгы солбуйааччы Тамара Давыдова туһунан суруйуута киирбитин этэн туран, бэлэх уунна. Олохтоох кыраайы үөрэтээччи Алексей Нестерев “үйэлээх, ыччакка хаалар үтүө дьыаланы саҕалаабытын үрдүктүк сыаналыырын, махтанарын” бэлиэтээтэ. Тамара Петровна бу үлэтэ “суруллубут суоруллубат” дииллэринии, кыраайы үөрэтиинэн дьарыктанар оскуола оҕолоругар олус туһалаах буолсу диэн бэлиэтиибит.
Анастасия ЛАЗАРЕВА, саха тылын уонна литэрэтиирэтин учуутала