Амма Наахара нэһилиэгин иллээх «Дуораанчык» уһуйаанын үлэһиттэрэ ханнык да үлэттэн толлон турбаттар. Бу күннэргэ кэлэктиип муус ылыытыгар субуотунньуктаатылар.
Сатабыллаах салайааччы Полина Кононова салайар тиэргэнэ, үлэлиир-хамсыыр дьиэтэ ыраахтан сандааран олус кэрэ көстүүлээх. Манна күннэтэ тиһигин быспакка саҥаттан саҥа тутуулар, араас кыраһыабай киэргэтиилэр, үрдүк таһымнаах үлэлэр ыытыллаллар. Аҕыйах хонуктааҕыта уһуйаан барыга көхтөөх үлэһитэ Николай Илларионов тыл көтөҕүүтүнэн, биир идэлээхтэр сойуустарын бэрэссэдээтэлэ Ефросинья Пахомова салайыытынан муус ылыытыгар субуотунньук тэрилиннэ. Дуораанчыктар ылбыт муустарын бэтэрээн үлэһиттэригэр, итиэннэ аҥардас ийэлэргэ, барыта 11 ыалга тыраахтарынан тиэйэн илдьэн, дьаарыстаан биэрдилэр. Барыга холобур буолар кэлэктиип иллээх олоҕо харахха быраҕыллар. Тыа ыалыгар тыын боппуруостары быһаарар үлэһиттэр өрүү бары тэҥҥэ сылдьан үгүс үлэни кыайаллар.
“Өр сылларга үлэлээбит детсаппыт кэлэктиибэ муус аҕалан үөртэ, долгутта. Өрүү маннык көхтөөх, таһаарыылаах, ситиһиилээх буолуҥ, үтүөнү оҥорбуккут сүүс төгүл бэйэҕитигэр эргиллэн доруобай, дьоллоох буолуҥ! Кыһамньыгыт иһин олус үөрдүбүт. Өр сылларга үлэлээбит иккис дьиэ оҥостубут детсаппыт үлэһиттэригэр улахан махтал. Тымныыны кэрэйбэккэ,бириэмэни аахсыбакка, бары көмөлөөн муус ылан тиэргэммитигэр аҕалбыттара саныырга да, чугас дьоммутун да кытта санаабытын да үллэстэрбитигэр наһаа үчүгэй. Бары биир киһи курдук Полина Петровна салайыытынан, профсоюз бэрэссэдээтэлэ Ефросинья Александровна көмөтүнэн оҥоһуллубут үтүө дьыалаҕыт үтүөнэн эрэ эргилиннин диэн баҕа санаабытын этэбит” — диэн бэтэрээн үлэһиттэр Матрена Петровна Петрова, Александра Тихоновна Константинова, Розалия Александровна Устинова махтал тылларын тириэрдэллэр.
Ирина КОРЯКИНА-ОЛЕСОВА