Муус устар 27 күнүгэр Өрөспүүбүлүкэ күнүн бэлиэтиэхпит. Бу бэлиэ күнү көрсө Амма улууһун үөрэҕин салаата уопсастыбаннай диэйэтэл, Аҕа дойду сэриитин кэмигэр өрөспүүбүлүкэҕэ үөрэх салаатын салайбыт Василий Назарович Чемезов төрөөбүтэ 110 сылыгар ананан ыытыллыбыт “төгүрүк остуол” матырыйаалларынан хомуурунньук бэлэмнээн таһаарда.
Быйыл кыһын Дьокуускай куоракка, СӨ Бырабыыталыстыбатын 2 нүөмэрдээх дьиэтин аактабай саалатыгар уопсастыбаннай диэйэтэл, история билимин кандидата, Саха АССР наукаларын үтүөлээх диэйэтэлэ Василий Назарович Чемезов төрөөбүтэ 110 сылыгар анаммыт тэрээһиннэри түмүктүүр, инники былааннары торумнуур “төгүрүк остуол” буолан ааспыта. Ол түмүгүнэн ураты хомуурунньук күн сирин көрдө. Амма улууһун үөрэҕин салалтата Өрөспүүбүлүкэ күнүн көрсө матырыйааллары түмэн үйэлээх бэлэҕи биир дойдулаахтарыгар уунна. Хомуурунньук СӨ үөрэҕин уонна наукатын миниистирэ Ньургууна Соколова, Ил Түмэн дьокутаата Александр Корякин, Амма улууһун баһылыга Степан Кузьмин, Амма улууһун үөрэҕин салалтатын начальнига Татьяна Иванова эҕэрдэлэриттэн саҕаланар. Хомуурунньукка “төгүрүк остуолга” ааҕыллыбыт дакылааттар, ыстатыйалар, туһалаах матырыйаалларга ссылкалар уонна мунньах түмүгүнэн ылыллыбыт этиилэр киирдилэр. Хомуурунньук биир уратытынан үс билим доктордарын ыстатыйата киирбитэ буолар. Ол курдук педагогическай наука доктора Феодосия Габышева, историческай наука доктора Сардаана Боякова уонна биир дойдулаахпыт филологическай наука доктора Николай Ефремов дириҥ ис хоһоонноох ыстатыйалара дьон болҕомтотун тардыахтара. Маны сэргэ Василий Назарович Чемезов үтүө аатын үйэтитэр, кини олоҕун сырдатар ыстатыйалар эмиэ интэриэһинэй буолуохтара диэн эрэнэбит.
«Хомуурунньук биир дойдулаахтарбыт ааттарын үйэтитэр, кэлэр кэнчээри ыччаты иитиигэ үтүө холобур буолар, ону таһынан, оҕолорго историяны үөрэтиигэ туһалаах матырыйаал буолуо», — диэн сүрүн эрэдээктэр, үөрэх салалтатын начальнига Татьяна Иванова бэлиэтиир.
Бу үлэ учууталларга, эдэр чинчийээччилэргэ, Амма историятын үөрэтэр краеведтарга уонна улуус биллиилээх дьонун үйэтитэр туһугар үлэни ыытар дьоҥҥо туһалаах буоллун. Саҥа тахсыбыт хомуурунньук электроннай версиятын Амма улууһун үөрэҕин салалтатын сайтын ситимигэр киирэн көрүөххүтүн сөп.
Акулина ИВАНОВА, хомуруунньугу таҥан таһаарааччы