Амма улууһугар сылын ахсын буолар педагогическай общественность балаҕан ыйынааҕы сүбэ мунньах иһинэн оскуолаҕа оҕону иитии чааһыгар үлэлэһэр исписэлиистэргэ анаан «Үөрэхтээһин эйгэтигэр иитии сүрүн оруола» диэн төгүрүк остуол буолан ааста. Тэрээһиҥҥэ дириэктэрдэри иитэр үлэҕэ солбуйааччылар, социальнай педагогтар, кылаас салайааччылара, төрөппүт сэбиэттэрин чилиэннэрэ — барыта 46 киһи кыттыыны ылла.
Сүрүн спикердэр — үөрэх салаатыгар начальнигы солбуйааччы Акулина Иванова, ыӈырыылаах ыалдьыппыт СӨ “Юнармия” штабын салайааччыта Александр Кузьмин, «Навигаторы» хамсааһын Амматааҕы салаатын салайааччыта Майя Карманова, үөрэх управлениетын иитиигэ сүрүн исписэлииһэ Алтана Артемьева, Амма улууһугар байыаннай-патриотическай хамсааһын салайааччыта Мичил Винокуров кыттыылаах киэҥ кэпсэтии үөрэх эйгэтигэр сүрүн уларыйыылары таарыйда.
Маны тэҥэ ааспыт үөрэх дьылын кылгас ырытыы кэнниттэн саҥа үөрэх дьылыгар былаан сүбэлэһиитэ буолла. Амматтан элбэх хамсааһын тахсыбытын бэлиэтээн туран оскуолалар иитиигэ бырайыактарын киэҥ эйгэҕэ тарҕатарга, эбии этиилэри хомуйарга, федеральнай бырайыактарга этиилэри ыытар туһунан быһаарыныылары ылынныбыт. Алтана Алексеевна тохсунньу ыйдааҕы сүбэ мунньах түмүгүнэн иитии үлэтигэр кылаас салайааччыларын үрдүк оруолун тоһоҕолоон туран, таҥан оҥорбут кылаас салайааччыларын уопуттарын тарҕатар кинигэтин олус сэҥээрдибит. Н.Е. Афанасьев төрөөбүтэ 150, О. П. Иванова — Сидоркевич 95, Ф. Лобанов 75 сыллаах уо. д. а. үбүлүөйдээх даталары, тэрээһиннэри, үйэтитии үлэтин ыытарга сүбэлэстибит. Түмүккэ, иитии былааннаах үлэ, мунньах этиилэрэ олоххо киирэллэригэр эрэлбитин биллэрдибит.
Акулина Иванова.