Л.В. Киренскэй аатынан Амматааҕы лиссиэй дьиэтигэр — уотугар онус кылааһы бүтэрбит уолаттар сыллата ыытылллар биэс хонуктаах улуустааҕы хомуурга киирэннэр дойдуну көмүскээччи буоларга бэлэмнэнэ сылдьаллар. Улуустааҕы түмсүү начаалынньыгынан лиссиэй учуутала Михаил Попов, начаалынньыгы солбуйааччынан Василий Лукин салалталарынан улуус 107 уолуттан 67 уол кэлэннэр буһуу-хатыы оскуолатын ааһаллар.
Уолаттар үгэс буолбут улуустааҕы байыаннай хомуурдарын үөрүүлээх арыллыыгар улуус баһылыгын социальнай боппуруостарга солбуйааччы Николай Ларионов уонна улуус военкома, анал байыаннай дьайыы кыттыылааҕа Вячеслав Маленков, улуустааҕы үөрэх салалтатын начаалынньыгын солбуйааччы Семен Шадрин эҕэрдэлэрин тириэртилэр, баҕа санааларын эттилэр. Улуус учууталларын күүстэринэн дойду көмүскээччитэ буоларга өй-санаа, эт-хаан өттүнэн бэлэм буоларга иһитиннэрэр-биллэрэр, үлэ, успуорт, култуура тэрээһиннэрэ тиһигин быспакка бара тураллар. Уолаттар эт-хаан өттүнэн, тактическай бэлэмнээһиҥҥэ, байыаннайдыы хаамыыга, устаабы билиигэ, сэрии сэбин туттарга, уопсай мэдиссиинэҕэ дьарыктары ааһаллар. Маны таһынан эр санааланыы уруоктара, байыаннай устаабы, сокуоннары, устуоруйаны, анал байыаннай дьайыы дьоруойдарын билиһиннэрии, бойобуой хаһыаты таһаарыы, футболга, дуобакка, волейболга, эстафетаҕа күрэхтэһии, уус уран самодеятельноһы көрүү, киинэлэри ырытыы уолаттарга көмөлөрө улахан. Ис дьыала салаатын сотрудниктара сэрэтэр үлэни ыыттылар. Уолаттар федеральнай бырайыагынан кэҥэтэн тутуллуохтаах лиссиэй 100 миэстэлээх эбийиэктэрдээх «Үүнээйис» сайыҥҥы лааҕырын сирин-уотун ыраастааһыҥҥа үлэлииллэр. Уһуйааччылар идэни талыыга үлэни эмиэ ыыталлар, байыаннай үөрэхтэри сырдаталлар, киин куораттарга, илин уһук баар үрдүк үөрэхтэрин билиһиннэрэллэр.
Взводтар хамандыырдарын солбуйааччыларынан лиссиэйтэн Данил Абрамов, Эмистэн Семен Степанов, Степан Степанов буолаллар. Бэлэмнэниигэ радиационнай-химическэй биологическай көмүскэниигэ Абаҕаттан Антон Никитин, Амма 1 оскуолатыттан Эрсан Павлов, Болугуртан Вася Марков, эт-хаан өттүнэн уопсай бэлэмнэниигэ лиссиэйтэн Толя Портнягин, Чакыртан Дархан Григорьев, Эмистэн Семен Степанов, Степан Степанов, Амма 1 оскуолатыттан Иван Неустроев, Бөтүҥтэн Тимофей Борисов, Алтантан Михаил Устинов, Болугуртан Вася Марков бастыҥнар истэригэр киирдилэр.
Василий Лукин, улуустааҕы байыаннай хомуур начаалынньыгын үөрэтии уонна иитии чааһыгар солбуйааччы, Сатаҕай орто оскуолатын «Төрөөбүт дойду куттала суох буолуутун уонна көмүскэлин төрүттэрэ», үлэ, уруһуй учуутала: «Уолаттары патриоттуу иитии, дойдуну көмүскээччини бэлэмнээһин кыра саастарыттан дьиэ кэргэнтэн саҕаланыахтаах. Айылҕаҕа сатаан сылдьарга, сиэрдээхтик сыһыаннаһарга, бултуурга, балыктыырга үөрэниэхтээхтэр. Маннык хомуур уолаттар эр киһилии сананалларыгар, атыттары кытта бодоруһалларыгар, кыахтарын холоноллоругар, бары өттүнэн дэгиттэр сайдалларыгар улахан көмөлөөх. Уол оҕо эт — хаан өттүнэн сайдыылаах буолуохтаах. Оскуолаҕа сиэксийэлэргэ, байыаннай успуорт кулууптарга дьарыктаныахтарын наада. Ааспыт сылларга тардыныылаах эрчиллиини 47-тэ оҥорор уолаттар бааллар этэ. Билигин ордук байыаннай успуорт кулууптарыгар дьарыктаммыт уолаттар көрдөрүүлэрэ үчүгэй. Кэнники сылларга доруобуйаларынан мөлтөх, кыаммат уолаттар элбээн иһэллэрэ бэлиэтэнэр. Байыаннай таҥаһынан хааччыйыыга болҕомтону ууруохха. Аҕалар уол оҕону олох кыратыттан үлэҕэ иитэллэрэ, эбээһинэс биэрэн эппиэтинэстээх буоларга, сүгэнэн, өтүйэнэн, күрдьэҕинэн тутта үөрэтэллэрэ булгуччулаах буолуон наада».
Алтана Артемьева