Үлэ Дьоруойа П.И. Яковлев аатынан Амма Наахара орто оскуолатын 3-с кылааһын үөрэнээччилэрэ «Класс-ный сок» диэн маастар кылаас тэрийэн алын сүһүөх үөрэнээччилэрин, учууталлары түмтүлэр. Оҕолор бу бырайыактара былырыыҥҥыттан үлэлиир.
Быйыл өссө эбии биир барайыак толкуйдаан кылаас икки бырайыактанна. Күһүн улууска ыытыллыбыт оскуола биисинэс-инкубатордарын дьаарбаҥкатыгар икки бырайыак элбэх дохуот киллэрэн ситиһии сиэттиспитэ. Оскуола бизнес-инкубаторын салайааччыта Марианна Михайловна Устинова кылааска киирбит дохуоту барыларыгар быһааран харчыны туттарбыта. Бу барыга көхтөөх үһүс кылааһы Айталина Анатольевна Филиппова салайар. Кылаас уон биэс үөрэнээччилээх. Араас таһымнаах күрэхтэргэ өрүү көхтөөхтүк кыттар.
Ыытыллыбыт «Класс-ный сок» маастар кылааска Филипп Пахомов, Максим Тарскай, Айтал Макаров, Артем Захаров, Даниэль Никитин бырайыактарын ымпыгар-чымпыгар тиийэ кэпсээтилэр. Онтон кыргыттар утаҕы хайдах оҥорору көрдөрдүлэр. Оҥорбут үлэлэрин дьаабылыка уонна апельсин утахтарын кэлбит ыалдьыттарыгар амсаттылар. Ыҥырыллыбыт үөрэнээччилэр утахтан астынан, бэйэбит оҥорорго үөрэнэр эбиппит дэстилэр.
Бу кылаас «Зеленые квартиранты» диэн дьиэтээҕи сибэккилэри төрөтөн, атыылыыр сыаллаах бырайыага быйылгы үөрэх сылыттан үлэлээн эрэр. Сибэккилэри күһүҥҥү дьаарбаҥкаҕа атыылаан кылаас бэйэтигэр ботуччу дохуоттаммыта. Билигин атыыга «Женское счастье», «Кливия» сибэккилэр бааллар. Маастар кылааска ыҥырыллыбыт уон икки үөрэнээччи, алта учуутал, биир төрөппүт оҕолор хайдах курдук биир санаанан үлэлииллэрин көрдүлэр, иһиттилэр. Үөрэнээччилэр билиҥҥи олоххо сөпкө дьаһанар дьон буола үүнэллэрэ барыбыт ситиһиибит буолар. «КЛАСС-ный сок» оҕолоро ситиһиилээх, эйэлээх дьон буола үүнүн, сайдын!
Ирина Корякина-Олесова.