Амма Наахара нэһилиэгэр спорт араас көрүҥнэринэн дьарыктанар, доруобуйаларын көрүнэр сэргэ үгүс. Бэҕэһээ Амма нэһилиэгин «Фаворит» бильярднай кулуубар нэһилиэктэр икки ардыларыгар ыытылла турар комплекснай спартакиадаҕа бильярдка нэһилиэктэрин чиэһин түһэн биэрбэтилэр.
Күрэх сүрүн сыалынан чөл олоххо угуйуу, бильярд оонньуутун бар дьоҥҥо көрдөрүү, киэҥ араҥаҕа тарҕатыы, олорор түөлбэҕэ күүстээхтэн күүстээҕи быһаарыы буолла. Сүрүннүүр судьуйанан Игнатий Иванович Гаврильев таһаарыылаахтык үлэлээтэ. Балаһыанньа ирдэбилинэн 40-нуу мүнүүтэлээх оонньууга хамаандаҕа 2 эр киһи, 1 дьахтар кытынна. Барыта 12 хамаанда күрэхтэстэ.
Амма Наахара чиэһин күрэхтэһиигэ Алексей Пахомов, Иван Пахомов уонна Туйаара Васильева көмүскээн, 1 миэстэни ылан Амма Наахара нэһилиэгэр олус күүтүүлээх кыайыыны аҕаллылар. 2-с миэстэҕэ Амма, 3-с миэстэҕэ Сатаҕай, 4-с миэстэҕэ Алтан нэһилиэктэрэ таҕыстылар. Тулуурга, дьулуурга үөрэтэр, киһиэхэ дуоһуйууну олохтуур бильярд көрүҥэр Амма Наахарабыт нэһилиэгин хамаандатын кыайыытын олохтоохтор ситим нөҥүө эҕрдэнэн, ис санааттан тахсар истиҥ тылларынан көрүстүлэр, өссө үрдүк ситиһиилэри баҕаран алгыс тыл маанытын анаатылар.
Ирина Корякина – Олесова.