Аллараа Бэстээх бөһүөлэгэр В.В. Местников аатынан култуурунай сайдыы киинигэр доруобуйаларынан хааччахтаах аҕалар ортолоругар «Ыал аҕата -ситим төрдө» диэн өрөспүүбүлүкэтээҕи күрэх ыытылынна. Күрэххэ Амма улууһун Местниковтар дьиэ кэргэттэрэ чиэстээхтик көмүскээтилэр.
«Аллараа Бэстээххэ бэртээхэй, олус туһалаах тэрээһин буолан ааста. Ол курдук эбиэккэ диэри «Киһи дьылҕата дьиэ кэргэҥҥэ түстэнэр. Дьиэ кэргэҥҥэ аҕа оруола» диэн «төгүрүк остуол» ыытылынна. Элбэх туһалааҕы биллибит. Оҕолор «Парус» диэн спорткомплекска экскурсияҕа сырыттылар. Уол оҕону иитиигэ кэпсэтиилэр ыытылыннылар. Дьэ онтон эбиэттэн киэһэ «Ыал аҕата — ситим төрдө» диэн аҕа уолунаан күрэхтэрэ буолла. Биһиги улууспутун олох кылгас бириэмэҕэ бэлэмнэнэн Чапчылҕантан Айхал уонна Вячеслав Васильевич Местниковтар олус үчүгэйдик көмүскээтилэр. Күрэх икки түһүмэхтээх. Ол курдук бэйэни билиһиннэрии уонна талааны, дьоҕуру көрдөрүү. Манна кыттааччыларбыт сонно тута холустаҕа маслянай кыраасканан айылҕаны уруһуйдаан, сөхтөрөн миэстэтигэр хартыыналарын атыылаһан ыллылар.
Онон дьэ биэс хамаанда киирсибититтэн, Местниковтар үһүс бочуоттаах миэстэни ылан үөрдүбүт аҕай. Ол курдук бастакы миэстэ Мэҥэ Хаҥалас, иккис миэстэ Горнай улууһа, онтон төрдүс миэстэ Дьокуускай уонна бэһис миэстэ Чурапчы улуустара буоллулар. Биһиги кыттааччыларбытын бэлэмнээн ыыппыт Чапчылҕан нэһилиэгин култууратын дьиэтигэр, инбэлииттэр түмсүүлэрин салайааччыта Нина Егоровна Устиноваҕа, ону сэргэ тиэйэн илдьэ сылдьыбыт уопсастыбабыт адаптивнай спорка исписэлииһигэр Афанасий Афанасьевич Абрамовка махталбытын тириэрдэбит. Ону кытта биллэн туран сөбүлэҥнэрин биэрэн ситиһиилээхтик киирсибит уопсастыбабыт чилиэнигэр Вячеслав Васильевич Местниковы уонна кини уолун Айхалы истиҥник эҕэрдэлиибит уонна махтанабыт»,- диэн Амма улууһун инбэлииттэрин уопсастыбатын бэрэссэдээтэлэ Светлана Софронова сырдатта.
«Амма олоҕо» хаһыат