Сулҕаччытааҕы Х. Максимов аатынан култуура киинигэр 31-с төгүлүн ыытыллыбыт “Көмүс куоласчаан” күрэх бэрт тэрээһиннээхтик ыытылынна. Быйылгы күрэх суруйааччы Семен Капитонов 75 сааһыгар ананна. Оҕолор ырыа да ыллаатылар, хоһоон да аахтылар, уруһуйдуур талааннарын көрдөрдүлэр, муода да айан билиһиннэрдилэр.
Сулҕаччы нэһилиэгэр сылын аайы ыытыллар аһаҕас улуустааҕы оҕо айар дьоҕурун сайыннарарга туһуламмыт “Көмүс куоласчаан” күрэх биир дойдулаахпыт, Арассыыйа суруйааччыларын Сойууһун чилиэнэ, СӨ култууратын үтүөлээх үлэһитэ, Амма улууһун, Сулҕаччы, Соморсун нэһилиэктэрин бочуоттаах олохтооҕо, бэйиэт Семен Капитонов 75 сааһыгар анаан ыытылынна. Күрэхпит Семен Спиридонович оҕо сааһын туһунан музыкальнай композициянан аһылынна. Кэрэхсэбиллээҕэ, убайбыт, киэн туттар суруйааччыбыт тэрээһиҥҥэ кыайан тус бэйэтэ кыайан кэлбэтэр даҕаны, Дьокуускай куораттан куйаар ситимин нөҥүө улахан экранынан истиҥник эҕэрдэлээтэ, “орто дойдуга соҕотох тапталлаах дойдутугар” , Сулҕаччытыгар, анаабыт хоһоонун ааҕан иһитиннэрдэ.
Күрэх хас да көрүҥүнэн барда. Ол курдук ырыа күрэҕэр 29 оҕо кыттына. Оҕолор Саха сирин уонна Амма мелодистарын төрөөбүт дойдуга таптал туһунан уонна Семен Капитонов тылыгар ырыалары толордулар, хоһоон ааҕыытыгар 33 оҕо холонно. Кинилэр Семен Капитонов патриотическай уонна айылҕаҕа, төрөөбүт дойдуга таптал туһунан хоһооннорун аахтылар. Биирдиилээн ааҕааччылары сэргэ икки бөлөҕүнэн ааҕыы баар. Ойуулук күрэҕэр 16 оҕо кытынна. Манна айылҕаҕа, төрөөбүт дойдуга таптал, Амма айылҕатын харыстааһыҥҥа туһуламмыт, ону сэргэ Семен Капитонов айымньыларынан 6 ойуулук киирдэ. Салгыы Семен Капитонов айымньыларын ис хоһоонун арыйар таҥаһынан уобарас айыы (муода) күрэҕэр 16 оҕо кыттыыны ылла, ол иһигэр бөлөҕүнэн уонна дьиэ-кэргэнинэн кыттыы биир. Барыта 107 оҕо уонна улахан киһи кыттыыны ыллылар. Хас да көрүҥнээх күрэх түмүгүнэн кыайыылаахтар бэлиэтэннилэр. Дьүүллүүр сүбэҕэ СӨ култууратын үтүөлээх үлэһитэ Ольга Судинова, СӨ култууратын туйгуна Елена Попова, Х. Максимов аатынан култуура киинин дириэктэрэ, СӨ култууратын туйгуна Жанна Максимова үлэлээтилэр.
Ырыаҕа Тамила Терентьева (Соморсун, сал. Т.Д. Белолюбская), хоһоон ааҕыытыгар Ахилл Другин (Сэргэ-Бэс, сал. О.Н. Иннокентьева), ойуулук (мультипликация) түһүмэҕэр “Ойуулук” куруһуок кыттаачылара уонна төрөппүттэрэ (сал. О.Т. Феофанова, Сулҕаччы) муҥутуур кыайыылаах буоланнар Сулҕаччы нэһилиэгин дьаһалтата туруорбут 5000 солкуобайдаах сертификатынан наҕараадаланнылар.
Элбэх оҕо, улахан да киһи кыттыылаах күрэххэ анал ааттарга бириистэри нэһилиэкпит тэрилтэлэрэ, урбаанньыттар уонна биирдиилээн дьон туруордулар. Ол курдук Х.Максимов аатынан Сулҕаччы култуура киинэ (дир. Ж.Г. Максимова), И.И. Константинов – Дэлэгээт Уйбаан аатынан Сулҕаччы орто оскуолата (дир. И.Г. Окороков), «Чычып-чаап» уһуйаан (сэб. А.К. Баишева), Амматааҕы РЭС Сулҕаччытааҕы учаастага (нач. Г.П. Христофоров), СӨ ГУП ОДьКХ Амматааҕы филиалын Сулҕаччытааҕы учаастага (нач. Н.М. Неустроев), РФ худуоһунньуктарын сойууһун чилиэнэ Николай Рязанскай, М.Н. Сибиряков аатынан Сэргэ-Бэс оскуолата (дир. Е.А. Христофорова), Саха наруодунай суруйааччыта Д.Ф. Наумов — Миитэрэй Наумов аатынан бибилэтиэкэ ( кыл. Бибилэтиэкэр Е.В. Попова), Амматааҕы кииннэммит бибилэтиэкэ тиһигэ (дир. П.Е. Прокопьев), “Гермес” маҕаһыын (ИП Дыдаев Н.Г.), “Сарыал” маҕаһыын (ИП Владимиров И.С.), ИП Феофанова Т.Н, ИП Максимова Я.В., Сулҕаччы нэһилиэгин дьаһалтата (баһ. А.Г. Степанов Артем Германович).
Анал аат хаһаайыннарынан буоллулар : ырыаҕа “Амма мелодистарын ырыатын бастыҥ толоруу” – Сандал Павлов, Сулҕаччы, “Семен Капитонов хоһоонугар ырыаны бастыҥ толоруу” – Василина Носова, Сулҕаччы, “Үрдук сценическай культура” Алиана Гоголева, Соморсун, “Ураты тыыннаах ырыа” – Яна Ефремова, Сулҕаччы. Хоһооҥҥо: “Ис хоһоону толору арыйыы” – Тимур Кузьмин, Сэргэ-Бэс, “Чуор куоластаах ааҕааччы” – Гриша Горохов, Соморсун, “Патриотическай хоһоону бастыҥ ааҕыы” – Герман Гоголев, Соморсун. Ойуулук (мультипликация): “Кыыс Амманы харыстаан” – Сэргэ-Бэс оскуолатын 5 кылааһын кэлэктиибэ, “Ойуулук бастыҥ куолаһа” – Алгыстана Васильева, Соморсун. Таҥаһынан уобарас айыы (муода): “Суруйааччы умсулҕана” – Екатерина Рязанская туруоруута, Сулҕаччы оскуолата, “Кэрэ көстүү”- Арина Стручкова, Сулҕаччы. Маны таһынан үгэс буолбут анал аат хаһаайыннарынан буоллулар: “Кыра кыттааччы” – 3 саастаах Кэрэли Капитонова, Сулҕаччы, “Бастыҥ салайааччы” – Туйара Белолюбская, Соморсун, “Сыл арыйыыта” – Сандаара Бурцева, Сулҕаччы. Маны сэргэ «Дьиэ кэргэнинэн кыттыы иһин» диэн номинацияны Сардаана, Айыллаана, Айсена, Айлина Сазоновтар ыллылар. Хас биирдии көрүҥҥэ кыттыбыт уонна лауреат, дипломант үрдүк аатын ылбыт кыттааччыларга суруйааччы Семен Капитонов 75 сааһыгар анаан оҥоһуллубут анал бэлиэ туттарылынна. Күн устата ыытыллыбыт тэрээһин үрдүк таһымнаахтык барда. Кыттааччыларга, көрөөччүлэргэ минньигэс астаах, чэпчэки сыаналаах буфет күн устата үлэлээтэ.
Елена ПОПОВА