Эмис нэһилиэгин Саппыйа алааһыгар норуот суруйааччыта Күннүк Уурастыырап төрөөбүтэ 120 сылыгар ананар “Күннүк сайына” диэн бэрт сэргэх, поэзияны сэргээччилэр тэрээһиннэрэ ыытылынна. Тэрээһин олохтоох модельнай бибилэтиэкэ көҕүлээһининэн барда.
“Биир дойдулаахпыт, саха норуотун тапталлаах норуодунай суруйааччыта Владимир Михайлович Новиков — Күннүк Уурастыырап кэлэр сылга төрөөбүтэ 120 сылын туолар. Онон бу дьоһун үбүлүөйү көрсө, кини төрөөбүт, сүүрбүт-көппүт алааһыгар бибилэтиэкэбит «Күннүк сайына» бырайыагын чэрчитинэн тэрээһин ыыттыбыт. Бу күн манна биир дойдулаахтара мустаммыт “төгүрүк остуол” тула олорон былааннары торумнаатыбыт. Кини хоһоонугар туойбут үрүмэччи маҥан атын аттыгар туран иэйиилээхтик хоһооннору аахтылар, ырыа буолбут хоһооннорунан ырыалары ыллаатылар. Маны сэргэ Күннүк Уурастыырап таптаан оонньуур саахыматын оонньоотулар.
Улууспутугар биллэриллибит Тыа хаһаайыстыбатын сылынан аҕам саастаах дьоммут, үлэ бөҕөтүн бэйэлэрин кэмнэригэр үлэлээбит Татьяна Романовна Иванова, Татьяна Никифоровна Новикова, Елена Захаровна Новикова, Наталья Николаевна Константинова, Ольга Саввична Михайлова, Иосиф Васильевич Петров, Софья Егоровна Соловьева, Елена Петровна Солдатова урукку совхоз, ферма күргүөмнээх үлэлэрин кэпсээтилэр, оччотооҕу сылларын ахтан-санаан аастылар. Кэлбит дьоммутун сылаас чэйинэн, итии миининэн, шашлыгынан, минньигэс тордунан күндүлээтибит.
Өссө «Айылҕалыын алтыһан» диэн Лилия Соловьева быыстапката туран дьон сэҥээриитин ылла. Оҕолорбутугар «Гиипсэҕэ уруһуй» тэрийэн аралдьытыы ыыттыбыт. Онон бу күн кэлбит дьоммут бары астынан, дуоһуйа кэпсэтэн, кэлэр сылга былааммытын торумнаан тарҕастыбыт”, — диэн олохтоох модельнай бибилэтиэкэ сүрүн бибилэтиэкэрэ Мираслава Ноговицына сырдатта.
“Амма олоҕо” хаһыат