Абаҕа нэһилиэгэр 1931 сыллаахха фельдшерскэй пуун арыллыбыта. Ол сылтан ыла дьон-сэргэ доруобуйатын туһугар элбэх үрүҥ халааттаах аанньаллар – быраастар, биэлсэрдэр, акушеркалар, сиэстэрэлэр, санитаркалар үлэлээн-хамсаан кэллилэр. Ол чаҕылхай туоһутунан 2023 сыллаахха Абаҕатааҕы врачебнай амбулаторияҕа 1950 сылтан үлэлээбит, бэйэтин суолун-ииһин хаалларбыт, олохтоохтор олус итиитик-истиҥник саныыр киһибит, ССРС доруобуйатын харыстабылын туйгуна Евдокия Иннокентьевна Борисова (Биэлсэр Дууса) аата иҥэриллибитэ буолар.
Үтүө үлэһиттэрдээх тэрилтэҕэ үтүө дьон кэлэн иһэллэр. Ол курдук 2017 сыллаахха Абаҕа участковай балыыһатыгар нарын-намчы бэйэлээх эдэркээн быраас, кийиит кыыс Лилия Владимировна Белолюбская үлэлии кэлбитэ.
Ыарыһахтарга ураты кыһамньытынан, эйэҕэс-элэккэй сыһыанынан, билиитинэн-көрүүтүнэн Лилия Владимировна Абаҕа олохтоохторун махталын, тапталын ылан, талан ылбыт идэтигэр бэриниилээҕин көрдөрөн, үлэлии-хамсыы сылдьар. 8 үлэһиттээх коллективы сатабыллаахтык салайан кэллэ, үлэһиттэр салайааччыларын олус сөбүлүүллэрин, убаастыылларын мэлдьи биллэрэллэр, киэн тутта кэпсииллэр.
Биир санаанан үлэлиир Абаҕатааҕы врачебнай амбулатория улууска биир бастыҥ үлэлээҕинэн биллэр, иллээх дьоҕус коллектив ыарахаттартан толлубакка нэһилиэнньэ туруга чөл буоларыгар араас өрүттээх үлэни ыытар, нэһилиэк общественнай олоҕуттан туора турбакка бары тэрээһиннэргэ, күрэхтэргэ актыыбынайдык кыттар холобурга сылдьар тэрилтэ буолар. 2022 сыллаахха саҥа дьиэҕэ киирэн коллектив да, олохтоохтор да үөрүүлэрэ үксээбитэ.
Тыа сиригэр терапевт быраас үлэтэ чэпчэкитэ суоҕун, үгүс бириэмэни, сыраны, билиини эрэйэрин бары билэ-көрө, истэ сылдьабыт. Күннээҕи көрүүттэн, ыарыыны сэрэтэр үлэттэн, диспансеризацияттан саҕалаан, араас ыксаллаах быһыыларга тиийэ, суһал быһаарыныылары эрэйэр түгэннэргэ киниттэн ураты эппиэтинэс, киэҥ билии ирдэнэр. Ону барытын биһиги Лилия Владимировнабыт толорон, билиитин-көрүүтүн барытын биэрэн үлэлии-хамсыы сылдьар. Лилия Владимировна кырдьаҕастарга ураты истиҥ сыһыанын бэлиэтиэхпитин баҕарабыт. Кырдьаҕастарга дьиэлэринэн сылдьан көрөр-истэр, саастаах дьон “кыыспыт” диэн истиҥник ааттыыллар, кэлэрин күүтэллэр. Кыайыы күнүн иннигэр тыыл бэтэрээннэригэр, сэрии кыттыылааҕын огдооботугар сылдьан доруобуйаларын туругун көрдө, сүбэ биэрдэ, эмтэнии анаата.
Эдэр быраас Лилия Владимировна Белолюбская салайааччылаах Абаҕа врачебнай амбулаториятын үлэһиттэригэр тулуурдаахтык, дьулуурдаахтык дьон-сэргэ туһугар чэпчэкитэ суох үлэлэригэр ситиһиини, олохтоохтохтор махталларын ыла туралларыгар, тус олохторугар дьолу баҕарабыт!
Розалия Гоголева.