Амма улууһун кылаабынай бырааһа Михаил Архипов сыллата Өрөспүүбүлүкэ күнүгэр ыытыллар Ил Дархан быһа эпиирин көтүппэккэ көрөр. Быйылгы да эпиири эмиэ истэн, доруобуйа харыстабылыгар сыһыаннаах этиилэри болҕойон иһиттэ.
“Үс чаастан ордук кэм ыытыллыбыт эпиири иһиттим. Амма уустара тахсыбыттарын сэргээтим. Маны сэргэ биллэн туран, доруобуйа харыстыбылын эйгэтин тула киирэр боппуруостары эппиэттэри болҕойон иһиттим. Ил Дархан чуолаан “мобильнай бырааска” тохтоото. Билэргит курдук 2023 сылтан Саха сирин үрдүнэн “мобильнай биригээдэ” бастаан хоту улуустарга сылдьан саҕалаабыта. Онтон 2024 сыллаахха “мобильнай хирургия” диэн киирбитэ. Маннык быһаарыылар ылыллыбыттарын нэһилиэнньэ сэргээтэ, табыгастааҕын бэлиэтээтэ. Тоҕо диэтэр ким барыта Дьокуускай куоракка киирэрэ ыарахан. Онон миэстэтигэр кэлэн уопуттаах улахан хирурдар кэлэн үлэлииллэрэ олус үчүгэй. Маннык “мобильнай хирургия” биригээдэтэ биһиэхэ иккитэ кэлэн барда. Ол курдук икки сыл устата 100-тэн тахса киһи араас эпэрээссийэни оҥортордо. Үксүн үөскэ, атах тымырдарыгар уонна сүһүөх уларытыытыгар барбыта. Маны сэргэ “мобильнай доктор” биригээдэтэ өрүс уҥуор сытар Чакыр нэһилиэгэр уонна онно сэргэ Покровка нэһилиэгэр сылдьан бараннар дьон олус астыммыта. Уопсайа 300 -тэн тахса киһини көрөн барбыттара. Быраастар бу курдук кэлэн көрөн бараллара, эпэрээссийэ оҥороллоро сүрдээх табыгастаах. Тоҕо диэтэр Сахабыт сирин территорията киэҥ, улуустарга, нэһилиэктэргэ исписэлиис быраастар суохтар. Мин санаабар бу бырайыак инникилээх. Быраастар маннык кэлэн бараллара, дьон доруобуйатын тупсарыыга, кини олоҕо уһууругар төһүү буолар. Ону Ил Дархан да эттэ. Кини “Доруобуйа 10 сыла” диэн бырагыраама ылыммыта. Бу олус улахан бырагыраама. Онно маннык быраастар улуустарга баран үлэлииллэрэ биир салаанан киирэ сылдьар. Нэһилиэнньэ бэйэтэ эмиэ эппиэтинэстээх буолуон наада. Ыарыытын эрдэттэн булларан, эмтэтэн, ыарахан турукка тириэрдиэ суохтаах. Маны сэргэ быһа эпиир кэмигэр элбэх боппуруос көхтөөх уһун үйэлэниигэ киирдэ. Бу хайысха түмүгэ барыта дьон олоҕо уһууругар диэн сыаллаах. Айсен Сергеевич ааспыт өртүгэр дьон олоҕун уһуна 70 сааһынан муҥурданар эбит буоллаҕына, билигин биһиги сыалбыт аҕам саастаах дьоммут 80 саастарын куоһаран, көхтөөх олоҕу олороллорун туһугар диэн этэр. Онон биһиги маннык быһаарыныы ылыналларыгар Ил Дархаммытыгар, бэйэбит Доруобуйабыт харыстабылын миниистирэ Лена Николаевна Афанасьеваҕа махтанабыт. Бу быһаарыныылар улахан үлэттэн тахсаллар. Түгэнинэн туһанан Сахабыт сирин бары олохтоохторугар, Аммабыт дьонугар-сэргэтигэр кытаанах доруобуйаны баҕарабын. Ыарыыны эрдэттэн сэрэтэн кэлэн көрдөрүнэргитигэр, ыытыллар диспансеризацияҕа кыттаргытыгар ыҥырабын”, — диэн Михаил Архипович эпиир кэнниттэн санаатын үллэһиннэ.
“Амма олоҕо” хаһыат