Амма улууһун баһылыгын бастакы солбуйааччы Василий Бураев Ил Дархан быһа эпииригэр киирбит Амма өрүс биэрэгэр кэлэн сынньанар туристар бөхтөрүн хаалларан барыыларын туһунан боппуруоһу сэргии истибитин, олохтоохтор өрүспүт, айылҕабыт ыраас буоларыгар болҕомтону өрөспүүбүлүкэ таһымыгар таһаарбыттара сөптөөҕүн бэлиэтиир.
“Мин Ил Дархан Айсен Николаев быһа эпиирин кэмигэр Абаҕа нэһилиэгиттэн Амма өрүс биэрэгин сайын аайы сынньана кэлэр туристар олус киртитэллэрин туһунан эппиттэрин сэргии иһиттим. Ити гынан баран оҕону айылҕаны харыстыырга оскуолаҕа үөрэтэр буолбатахтар, үөрэтэллэр. Манна араас экологическай да акциялар бараллар, биһиги улуустааҕы экологиябыт инспекцията оскуола оҕолорун кытта бэртээхэй тэрээһиннэри ыытар. Онон Айсен Сергеевич айылҕаҕа сыһыан оскуола эрэ соруга буолбакка, бу хас биирдиибиттэн, дьиэ кэргэнтэн саҕаланар диэн саамай сөпкө бэлиэтиир. Чахчы да биһиги ис култуурабытын уларыта иликпитин итинник кэмэлдьи сыһыаммыт салҕанан бара туруо. Биһиги улуус саамай ыраас өрүстээх, кэрэ айылҕалаах буоламмыт, экология боппуруоһа күүскэ турар. Быйыл от ыйын үһүс өрөбүлүгэр, ол эбэтэр от ыйын 19 күнүгэр Амма өрүс күнэ бэлиэтэниэ. Ол курдук от ыйын үһүс өрөбүлүн баһылыкпыт Николай Архипович Архипов 2018 сыллаахха Амма өрүс күнүнэн олохтоон турар. Тэрээһиҥҥэ Арассыыйа айылҕаҕа харыстабылын министиэристибэтэ кыттара былааннанар. Ол курдук федеральнай таһымнаах дэлэгээссийэ кэлэн биһиги Амма өрүспүт биэрэгэр “Ыраас өрүс” диэн Бүтүн Арассыыйатааҕы экологическай субуотунньугу ыытыа. Биһиги маннык улахан таһымнаах тэрээһин улууспутугар ыытылларыттан киэн туттабыт, биллэн туран долгуйабыт уонна бэйэбит салалтабытыгар тапталлаах ыраас өрсүпүтүгэр болҕомтону ууралларыгар дириҥ махталбытын тириэрдэбит. Быһа эпииригэр Айсен Сергеевич Амма өрүс уонна атын да өрүс биэрэктэрэ ыраас буолууларын туһугар оҕо эрэ буолбакка, хас биирдии улахан киһи ис култуурата улаатыахтаах уонна эппиэтинэһи сүгүөхтээх диэн этиитин кытта толору сөпсөһөбүн уонна өйүүбүн. Онон бары өрөспүүбүлүкэ олохтоохторун, Аммабыт улууһун дьонун-сэргэтин ыраас, сырдык уулаах Аммабыт өрүһүн кытыла куруутун ыраас, бэйэтэ үйэлэргэ наҕыллык уста турарын туһугар кыһаллыаҕын диэн ыҥырабын”, — диэн Василий Иванович санаатын тириэртэ.
“Амма олоҕо” хаһыат