Соморсун нэһилиэгин баһылыгын солбуйааччы Надежда Белолюбская Ил Дархан Айсен Николаев быһа эпиирдэрин биири да көтүппэккэ көрөр. Маннык эпиирдэргэ Айсен Сергеевич Саха сирин олохтоохторун долгутар тыын боппуруостарга киэҥ ис хоһоонноох эппиэттэри биэрэр. Биһиги Аммабыт улууһугар үрдүк күүрүүлээх уот боппуруоһа бэбиэскэттэн түспэккэ хас отчуот аайы сытыытык турар.
Сахабыт сиригэр энергетикабыт мөлтөҕө хас биирдии киһини долгутар. Энергетиканы сайыннарыы тула үгүс быһаарыныы ылыллан эрэриттэн, күннээҕи олохпут биир саамай тыын боппуруоһа быһаарыллар суолга киирбитин сэргии иһиттим. Айсен Сергеевич энергетикаҕа государственнай сэбиэти тус бэйэтэ салайарынан, бу кыһалҕаҕа сөптөөх хайысхалары тобулан, бу салааҕа сайдыы барарыгар эрэнэбит, — диэн Надежда Гаврильевна санаатыгар кыттыһабыт, уоппут-күөспүт күүһүрэн сайдыы тэтимнээхтик барарыгар эрэнэбит.
Вера ИВАНОВА.
