Дойду Бэрэсидьиэнэ Владимир Путин көҕүлээбит “Уһун уонна көхтөөх олох” национальнай бырайыак көмөтүнэн Амма киин балыыһатын стационарыгар терапия салаата сотору кэминэн иккис тыынын ылан арыллыаҕа. Бу күннэргэ өрөмүөн үлэлэрэ толору бүттүлэр, сууйуу-сотуу хаалбытын туһунан киин балыыһа кылаабынай бырааһа Михаил Архипов иһитиннэрэр.
“Терапия салаатыгар хапытаалынай өрөмүөн үлэтэ ыам ыйыттан саҕаламмыта. Бу кэм устатыгар ититэр ситимэ, уота-күөһэ, уунан хааччыллыыта бүтүннүү уларыйда. Палаталарга муосталара уларыйда, ис өттүгэр үлэлэр бардылар. Өрөмүөн барар кэмигэр терапия салаатын үлэтэ тохтооботоҕо. Бу салаа ыарыһахтарын уонна суһал көмөнү ылар дьоҥҥо анаан быстах кэмҥэ хостору булан биэрбиппит. Онон эмтэнии тохтообото. Саҥа салаа арыллыннаҕына, ыарыһахтарбыт аныгы ирдэбилгэ барытыгар эппиэттиир дьиэҕэ-уокка сытан эмтэниини ылыахтара диэн үөрэбит”, — диэн этэр Михаил Архипович.
Кини бэлиэтээн эппитинэн сотору кэминэн сууйан-тараан, салааны от ыйын бүтүүтэ арыйыахтара.
“Амма олоҕо” хаһыат