Амма Наахара оскуолатын 2021 сыллаах выпуснига, олоххо актыыбынай көрүүлээх ыччаппыт, нэһилиэк биир бастыҥ ыалын Мария, Евгений Пахомовтар улахан оҕолоро Альберт Пахомов устудьуоннарга ыытыллар «Мисс и Мистер СПО» күрэххэ кыайыылаах үрдүк аатын сүктэ.
«Бэҕэһээ Дьокуускай куоракка Гагарин аатынан сайдар кииҥҥэ олус үрдүк таһымнаах орто анал үөрэххэ үөрэнэ сылдьар устудьуоннарга «Мисс и Мистер СПО» күрэх тохсус төгүлүн буолан ааста. Саха Өрөспүүбүлүкэтин араас муннуктарыттан барыта 16-а уол, 13-с кыыс кыттыыны ылла.
Устудьуоннар араас тургутууну аастылар.
Күрэх муус устар 5 күнүттэн хаартыскаҕа түһүүттэн саҕаламмыта. Сарсыныгар муус устар 7 күнүгэр талаан күрэҕэ ыытыллыбыта. 8-с чыыһылаҕа ГТО туттарыыта, 9-ска бырайыак көмүскээһинэ буолбута.
Муус устар 12-с күнүгэр айар-тутар түһүмэххэ инники түһүмэхтэри ааспыттар киирбиттэрэ. Манна киэһээҥҥи көстүү, 39-с боппуруостаах космонавтикаҕа сыһыаннаах өй-санаа билиитин тургутугар күрэх, космоска сыһыаннаах үҥкүү түһүмэхтэрэ ыытылыннылар.
Оҕом Альберт Пахомов Чурапчытааҕы аграрнай-техническэй колледж аатыттан
ситиһиилээхтик кытынна. Кыттааччылар талааннарын, сатабылларын, киһи быһыытынан майгыларын, ис кыахтарын толору көрдөрдүлэр. Үөрэнэр тэрилтэтэ, доҕотторо өйөөбүттэригэр, көмөлөспүттэригэр махтал тылларын аныыбыт. Түгэнинэн туһанан Альберт сайдарыгар сыраларын уурбут «Дуораанчык» уһуйаан үлэһиттэригэр, Үлэ дьоруойа П.И. Яковлев аатынан Амма-Наахара орто оскуолатын кэлэктиибэр,«Түмэн» сынньалаҥ киинигэр ис сүрэхпиттэн махталбын тиэрдэбин. Өссө да элбэх оҕо сайдарыгар тирэх буолун, махтал тылларын өрүү ыла туруҥ диэн алгыс тылларын ыытабын» — диэн сэһэргиир Альберт ийэтэ үрдүк категориялаах алын сүһүөх учуутала Мария Павловна.
Амма Наахара нэһилиэгин дьоно-сэргэтэ, аймахтара, олоҕун чочуйбут учууталлара Альберт кыайыытынан олус үөрдүбүт. Уолбутунан киэн тутуннубут. Бу ситиһии бастыҥ уолбутун Альберты сырдыкка сирдээн, олоххо чопчу сөптөөх суолу буларыгар тирэх буолуо дии саныыбыт. Альберт Пахомовка санаабытын сатаннын, толкуйдаабытын тобуллан истин, өрүү сылдьарын курдук үгүс доҕордоох, ырыа аргыстаах, чөл олохтоох үөрэ-көтө сылдьаргар баҕарабыт. Үөрэххин ситиһиилээхтик бүтэрэн, талбыт идэҕэр бастыҥ үлэһит буолан төрөппүттэргин, төрөөбүт дойдугун ааттата тур диэн баҕа санаабытын аныыбыт.
Ирина Корякина-Олесова.