Бу күннэргэ сурутуу хампаанньата көхтөөхтүк бара турар. Ил Түмэн дьокутаата Александр Корякин улуус хаһыатын куруутун өйүүр уонна элбэх оҕолоох, анал байыаннай дьайыы кыттыылаахтарын биэс дьиэ кэргэнигэр биир толору сылга сурутта. Онон биэс ыал хаһыат сурутуу түмүгүнэн ыытар оонньуутугар кыттар уонна Чугдаара Хотун алгыстаах халандаарын тутар кыахтаннылар.
«Улуус хаҺыата — бу нэһилиэнньэ трибуната, улуус сиэркилэтэ. Аммаҕа да олорон билигин Дьокуускайга да олорон улууһум хаһыатыгар куруутун сурутабын. Хаһыат суолтата хаһан да сүппэт. Манна тахсар сонуннар, ыстатыйалар кырдьыктаахтар. Билигин сорохтор социальнай ситиминэн кылгас иһитиннэриилэри көрөн, сонуннары ааҕан барытын билэ олоробут дииллэрэ тутах. Кумааҕы хаҺыаты тутан, сытан, олорон ааҕарга да астык. Улууспут хаһыатын бэйэм эрэ буолбакка, ааспыт сылларга курдук улууҺум элбэх оҕолоох уонна анал байыаннай дьайыыга сылдьар уолаттар дьиэ кэргэннэригэр суруттум», — диэн этэр Александр Иванович.
Кинини кытта көрсүһүүбэр аҥардас сурутуу эрэ туһунан буолбакка, биллэн туран билигин бары дьону долгутар таас чоҕунан хааччыллыы туҺунан ыйыталастым. Хаһыат сүрүн соруга -нэһилиэнньэ кыҺалҕатын үрдүкү былааска тириэрдии буолар буоллаҕа. Маныаха Александр Иванович боппуруоһу үрдүкү салалтаҕа туруоран, чох разреҺын салайааччыта Прокопий Дмитриевич Рахлеевы кытта тэрилтэ кыһалҕаларын быһаарсан, чоҕу таһыы тохтуо суоҕа. Билигин тэрилтэ хостуур кээмэйин улаатыннаран, Аммаҕа күннэтэ 400-тэн тахса тонна чох таһылла турар. Манна таһар тэрилтэни кытта эмиэ кэпсэтии барбыт. «Боппуруос күннэтэ болҕомтоҕо сылдьар. Быйыл улахан ситиҺиибитинэн 2026 сыл бюджетигэр олох-дьаһах коммунальнай хаҺаайыстыба эйгэтигэр ааспыт сыллааҕар элбэх үп тыырылынна. Ону ситиҺэргэ элбэх үлэ барда. Тоҕо диэтэр биҺиги курдук уҺун кыҺыннаах дойдуга олох-дьаҺах хаһаайыстыбата туруктаах буолуута — тыын боппуруос» диэн эттэ Александр Иванович. Маны сэргэ кини билигин төҺө да уустук балаҺыанньа буоллар, Амма улууҺун коммунальнай хаҺаайыстыбата чааҺынай ыалларга киин ититии ситимин киллэриини ыытта. Онтон бу дьоҥҥо -сэргэҕэ улахан үөрүү, олоххо-дьаһахха суолтата сүдү диэн бэлиэтээтэ.
«Амма олоҕо» хаһыат