Ахсынньы – дьыл түмүктэрин таһаарар эрэ ый буолбатах. Кэлэр сылга былааннары туруоруу, үлэ-хамнас соруктарын торумнааһын эмиэ бу кэмҥэ түбэһэр. Оттон бэчээт үлэтин биир сүрүн хайысхатынан үүнэр сылга сурутууну тэрийии буолар. Маныаха хаһыат коллективын үлэтин, суолтатын өйдөөн улуус салалтата, нэһилиэктэр баһылыктара, тэрилтэлэр салайааччылара ыҥырыы таһааран хаһыакка сурутууну өйүүллэрэ кумааҕы бэчээт суолтатын үрдэтэр, сүппэт үйэлиир.
Судаарыстыба тиэрдибит сорудаҕын толоруу, кумааҕы хаһыат ахсаанын тутан хаалыы – улуус хаһыаттарын үлэтин биир сүрүн сыала-соруга. Ону ситиһэргэ бу сыллар тухары биһиэхэ сүрүн көмөлөһөөччүлэринэн улуус, нэһилиэктэр баһылыктара, кинилэр солбуйааччылара уонна тэрилтэлэр салайааччылара, үлэһиттэрэ буолаллар.
Инникитин кумааҕы хаһыат сүппэтин, симэлийбэтин туһугар кинилэр киллэрэр кылааттара олус суолталаах. Онон үүнэр сылга хаһыакка сурутууну өйөөбүт бары дьоммутугар, Дьокуускайга олорор биир дойдулаахтарбытыгар бииргэ үлэлээһини өйөөбүккүтүгэр дириҥник махтанабыт. 2026 сыл эһиэхэ элбэх ситиһиилэри, нус-хас олоҕу, дьиэ кэргэҥҥиитигэр этэҥҥэ буолууну аҕаллын. Кэлэн иһэр Саҥа дьылынан!
“Амма олоҕо” хаһыат.