Алтынньы 6 күнүттэн саҕалаан уон күн устата үгэс буолбут кэлэр 2027 сыл бастакы аҥарыгар бары сурунаалларга, хаһыаттарга чэпчэтиилээх сурутуу ыытылла турар. Ол иһигэр “Амма олоҕо” хаһыакка эмиэ табыгастаахтык, барыстаахтык сурутуохха сөп. Хаһыат эрэллээх сурутааччыта, көмөлөһөөччүтэ Руслан Федотов хаһан да буоларын курдук уон киһиэхэ хаһыаты алта ыйга толору суруттарда, аҕам саастаахтар декадаларынан бэлэх уунна.
“Дьиҥинэн бу иннинэ куруутун сылга толору сурутар буоларбыт. Ол гынан баран билигин сыл аҥарыгар эрэ сурутуу барар эбит. Онон бэйэм улууһум хаһыатын өйөөн, уон Лээгиттэн төрүттээх бэйэм биир дойдулаахтарбар алта ыйга хаһыакка суруттардым. Биһиги тэрилтэбит улуус хаһыатын кытта ыкса үлэлэһэн кэлбитэ ыраатта. Улуус хаһыата диэн бу улуус сиэркилэтэ буоллаҕа дии. Хаһыаттан ааҕан улууһун олоҕун, историятын билэҕин. Кэлбит ыалдьыт эн дьиэҕэр сылдьан улууһун хаһыатын ааҕан, сонуну да, дьонун-сэргэтин да билэр. Билиҥҥи араас информация кэлэ турар кэмигэр, хаһыат саамай кырдьыктаах сырдатааччы буолар дии саныыбын. Хайа уонна улуус олохтооҕо, Аммабын диир буоллаххына, хайаатар да дьиэҕэр улуус хаһыаттаах буолуохтааххын, кини баар буолуутун туһугар өйөөн сурутуоххун наада дии саныыбын. Чахчы этэллэрин курдук, суруллубут суоруллубат. Бары тэрилтэ салайааччыларын, баһылыктары бэйэҕитигэр эрэ буолбакка, чугас дьоҥҥутугар эмиэ сурутан үйэлээх бэлэхтэ оҥорун диэн ыҥырабын”, — диэн Руслан Еремеевич санаатын тириэртэ.
Биһиги куруутун өйөбүл буолар, ыарахан күннэрбитигэр өйөбүл, мунаарар кэммитигэр үтүө сүбэһит буолар киһибитигэр, “убаай” диэн истиҥник саныыр Руслан Еремеевичка дириҥ махталбытын тириэрдэбит.
“Амма олоҕо”хаһыат