Бүгүн Арассыыйа үрдүнэн Меценат уонна үтүө санааны толоруу күнэ бэлиэтэнэр. Амма, Мэҥэ Хаҥалас улуустарын, ону кытта хас да нэһилиэк бочуоттаах олохтооҕо Руслан Федотов Арассыыйа бочуоттаах мецената буолар.
Тумус туттар биир дойдулаахпыт Руслан Еремеевич Федотов биллэр меценат- урбаанньыт буолар. Кини Аллараа Бэстээххэ баар кабинетын аана хаһан да сабыллыбат. Араас кыһалҕалаах дьон күннэтэ киирэн, кэпсэтэн, сүбэ да ылан, көмө да көрдөһөн бараллар. Руслан Еремеевич биһиги эрэдээксийэбит хас эмэ сылларга саамай эрэллээх сурутааччыта, көмөлөһөөччүтэ буолар. Кини биһиги эрэ ээрдээксийэбитигэр буолбакка, атын улуус эрэдээксийэлэригэр эмиэ оҥорор көмөтө элбэх. Үгүс дьон “убайбыт” диэн ытыгылаан ааттыыр киһибит урбаанньыт бурҕалдьытын сүгүөҕүттэн дьоҥҥо-сэргэҕэ төһөлөөх көмөнү оҥорон кэлбитин этэргэ диэри ааҕан сиппэккин. Ол курдук спортсменнарга, эмтэнэ барааччыларга, атын да кыһалҕалаах дьоҥҥо оҥорбут үтүөтэ элбэх. Анал байыаннай дьайыыга сылдьар уолаттарга, мантан барар гуманитарнай көмөнү оҥорууга Руслан Еремеевич хара бастакы күннэртэн туора турбатаҕа. Кини Амматын улууһугар социальнай эбийиэктэр тутуллууларыгар, тыа хаһаайыстыбатын тэрилтэлэригэр улахан өйөбүлү оҥорор. “Үтүө үтүөнэн эргиллэр” диэн кынаттаах этии баар. Руслан Еремеевич тус бэйэ иннин эрэ көрүнэн олорор буолбакка, дойдутун дьонугар кыһаллар. Ол да иһин кини аатыгар мэлдьи махтал тыллара этиллэллэр. Дэлэҕэ кини хас эмэ нэһилиэк Бочуоттаах гражданина буолуо үһү дуо? Бу аат-суол, наҕараада кэннигэр үтүмэн үгүс үлэ турдаҕа эбээт.
“Киһи хаһан баҕарар ханнык да кэмҥэ киһитинэн хаалыахтаах дии саныыбын. Эн араас элбэх үлэни оҥорон баран, дьонтон төттөрү хайыһа сылдьар буоллаххына, эйигин ким да үтүө тылынан ахтыбат, дьон өйүгэр-санаатыгар хаалбаккын. Ханнык баҕарар ыарахаттары дьон түмүстэҕинэ кыайар. Онон дьоҥҥо үтүөнү эрэ баҕаран олоруохтаахпыт. Тоҕо диэтэххэ, олох биирдэ эрэ бэриллэр күндү бэлэх буолар. Ол олоххор аатыҥ үтүөнэн эрэ ахтылларын курдук дьоһуннук олорорго кыһаллыахтааххын. Ону хас биирдии киһи өйдүөхтээх. Миэхэ дьон кыһалҕалаах кэллэҕинэ, хайаатар да истэбин уонна туох кыалларынан көмөлөһө сатыыбын. Дьон бары оннук буолуохтаах. Көмө улахан да, кыра да диэн арахсыа суохтаах. “Киһиэхэ кып-кыра да наада, диэн этии мээнэ баар буолбатах. Кырдьык оннук. Ыарахан кэмҥэ киһиэхэ кыра да көмө оҥоһулуннаҕына, ол киниэхэ өйөбүл буолар, санаатын көтөҕөр. Онон, мин санаабар, үтүөнү оҥоруу хас биирдии киһиттэн тахсыахтаах. Оччоҕо биһиги олохпут сырдык уонна ыраас буолуоҕа. Үтүө санаа киһини үрдүккэ кынаттыыр. Мин бүгүн Арассыыйаҕа бэлиэтэнэр Меценат уонна үтүөнү санааны толоруу күнүнэн ис сүрэхтэн бары дьонноругар-сэргэлэригэр күүс-көмө буола сылдьар дьоммутун истиҥник эҕэрдэлиибит. Билигин биир да тэрээһин урбаанньыт көмөтө суох ыытыллыбат. Онон кыһалҕалаах дьоҥҥо туох кыалларынан үлэлэһэ сылдьар дьоҥҥо үлэлэригэр-хамнастарыгар ситиһиини, үтүө санааҕыт хаһан да уҕараабатыгар баҕарабын. Бары чэгиэн, ылыммыт сыалгыт ыпсан, тутуспут суолгут тупсан, санаабыт санааҕыт сатанан истин!”, — диэн этэр Руслан Еремеевич баҕа санаатын тириэртэ.
«Амма олоҕо» хаһыаттан