Урбаанньыт, биир дойдулаахпыт Руслан Федотов өссө биир үтүө дьыаланы оҥордо. Өлүөнэ өрүһү туоруурга удамыр сыананы олохтоон дьоҥҥо олус көмө буолбут “Сулус” тэрилтэҕэ “Хивус-10” салгын суудунатын туттарбытын социальнай ситимнэринэн истэн сибээскэ тахса сырыттыбыт.
“Саҥа атаҕар туран дьоҥҥо күүс-көмө буолар, удамыр сыананы олохтоон үгүс илин эҥэр олохтоохторун үөрпүт “Сулус” тэрилтэни өйөөн собуот бэйэтин сыанатынан, бырыһыана суох, кинилэр сыыйа төлөһөллөрүгэр диэн салгын суудунатын биэрдим. Ону кытта суудунаны өрүскэ тиэйэн киллэрэр-таһаарар бырысыаптаах, атын саппаас чаастардаах. Уолаттар бу нэһилиэнньэ туһугар үлэлиир дьоһун саҕалааһыннара ситиһиилээх буоллун. Аны күһүн хаайтарыы кэмигэр дьоммут-сэргэбит эрэйэ суох туоруохтара диэн эрэнэбин”, — диэн этэр Руслан Еремеевич.
Дьэ онон биир дойдулаахпыт көмөтүнэн аны күһүн удамыр сыанаҕа Өлүөнэбитин туоруохпут буоллаҕа.
“Амма олоҕо”хаһыат