Амма улууһун 2-Чакыр нэһилиэгэр үлэ ветерана, нэһилиэк Бочуоттаах олохтооҕо Иванов Семен Гаврильевич төрөөбүтэ 70 уонна Амма улууһугар Тыа хаһаайыстыбатын сылларыгар анаан төгүрүк остуол буолан ааста.
Чакыр нэһилиэгин библиотекатын дьиэтигэр «Иванов Семен Гаврильевич — дойдутун туһугар олорон ааспыт киһи» диэн төгүрүк остуол буолан ааста. Бу тэрээһин икки суолталаах бэлиэ күннэргэ ананна: Амма улууһугар Тыа хаһаайыстыбатын сылыгар уонна төрөөбүт нэһилиэгэр 44 сыл үлэлээбит, тыа хаһаайыстыбатын туйгуна, биһиги күндү аҕабыт, эһээбит Иванов Семен Гаврильевич 70 сылыгар анаан буолла. Төгүрүк остуолга биһиги кини дьиэ кэргэнэ, ийэбит Нина Никифоровна Иванова, оҕолоро, аймахтара, бииргэ үлэлээбит доҕотторо, нэһилиэк дьоно-сэргэтэ кыттыыны ыллылар.
Көрсүһүүгэ нэһилиэк олохтоохторун, ыччаты үлэҕэ уһуйууга, төрөөбүт дойдуга тапталы иҥэриигэ Семен Гаврильевич олоҕун холобура улахан суолталааҕын бэлиэтээн туран кэпсэтии буолла. Кэлбит дьон биһиги аҕабыт «Семен Гаврильевич көрсүө, сэмэй, үлэни ытыктыыр, дьону таптыыр, ыраас дууһалаах киһи этэ» — диэн истиҥник бэлиэтээн биһиги олус долгуйдубут. Ийэбит Нина Никифоровна кинини кытта билсиһиилэриттэн саҕалаан, ыал буолууларыттан, оҕоломмуттарын, үлэлэрин туһунан, үтүөлээх сылларыттан сырдатан-ахтан ааста. Ураты болҕомтону бииргэ үөрэммит, алтыспыт, үлэлээбит дьон ахтыылара ыллылар. Кинилэр биһиги аҕабытын кытта Молуода, Тыымпы, Туора Үрэх, Дарааны курдук ыраах оттуур сирдэргэ бииргэ үлэлээбиттэрин, кини звеноводунан сылдьан ыччаты үлэҕэ уһуйуутун, үтүө майгытын-сигилитин ахтан-санаан аастылар. Кэпсэтии кэмигэр бары санааларын, ахтыыларын толору этэн, түмсүү түмүгэр аҕабыт, эһээбит үтүө аата умнуллуо суоҕугар, ыччаттарга холобур буолуоҕар баҕа санааларын тиэртилэр. Тэрээһиммит уратытынан буолла, ийэбит биһиэхэ бэлэмнээн аҕабыт туһунан оҥорбут истиҥ альбома уонна Амма улууһугар тыа хаһаайыстыбатын сылыгар анаан биһиги оҥорбут боппуруостарбытынан «Своя игра» викторина. Викторина олус көхтөөтук ааста, история страницаларын сэгэтэн үксүбүт саҥаны, умнуллубуту биллибит.
Тэрээһиммитин өйөөбүт дьоммутугар, нэһилиэкпит
баһылыгар Семен Николаевич Григорьевка, Р. В. Илларионова аатынан олохтоох библиотека салайааччытыгар Матрена Анастасовна Игнатьеваҕа, бар дьоммутугар махталбытын биллэрэбит.
Кыра кыыһа Акулина Иванова.