Тыа хаһаайыстыбатын техникатынан, саппаас чаастарынан өрөспүүбүлүкэ үгүс улуустарын хааччыйан олорор Руслан Федотов салайааччылаах тэрилтэ быйыл да окко наадалаах техниканы барытын аҕалан олорор. Бу күннэргэ хаһаайыстыбалар кэлэн наадыйар техникаларын, саппаас чаастарын ылаллар.
“Биһиги тэрилтэ Арассыыйа собуоттарын сэргэ, Белоруссия өрөспүүбүлүкэтин собуоттарын кытта үлэлэһэр. Саҥа дьыл кэнниттэн саҕалаан окко туттулар араас техниканы, саппаас чаастары сакаастаан барыта бириэмэтигэр кэлбитэ.
Холобура бу күннэргэ Амма Абаҕатыттан “Илгэ” хаһаайыстыба кэлэн рулоннуур техниканы уонна онно наадалаах саппаас чаастары ылан барда.
Ону сэргэ улуус бары хаһаайыстыбалара эмиэ дуогабардаһан техникаларын ылан эрэллэр. Былдьаһыктаах күннэргэ техника үчүгэйдик үлэлээтэҕинэ улахан иэннээх ходуһалары аҕыйах хонукка оттоон бүтэриэххэ сөп. Биһиги бэйэбит эмиэ оттообуппут хаһыс да сыла. Ол курдук Аммаҕа 400 га сиргэ бурдук, элбэх сыллаах от ыспыппыт. Ааспыт уонна да ол иннинээҕи сылга үүнүү куһаҕана суох этэ. Онон бу саас отторо тиийбэтэх сүөһүлээх дьоҥҥо сенаж да, кур оту да босхо биэрбиппит. Быйыл элбэх сыллаах окко хаһаайыстыбалары кытта дуогабардастыбыт. Билигин бары улуустарга окко киирээри күүстээх бэлэмнэнии бара турар. Биһиги «Сенокос- Техника» диэн маҕаһыыммытыгар оттооһун хампаанньатын бириэмэтигэр ыытан, сөпкө түмүктүүргэ аналлаах бары техника, саппаас чаас баар.
Онон бары тыа хаһаайыстыбатын эйгэтин үлэһит дьонугар өлгөмнүк оттоон кыстыгы эрэллээхтик көрсөллөрүгэр баҕарабын”, — диэн “Руслан” эргиэн киинин ситимин салайааччыта Руслан Федотов санаатын үллэһиннэ.
“Амма олоҕо” хаһыат