Сурутуу хампаанньата түмүктэнэрэ олох аҕыйах хонук хаалла. Амма улууһун баһылыга Степан Кузьмин улуус хаһыата хас биирдии ыалга баар буолуохтаах диэн бэлиэтиир уонна сыллата улууһун хаһыатын сурутан ааҕар. Ааспыт сылга элбэх оҕолоох ыалга уонна аҕам саастаах дьоҥҥо сурутан биэрбитэ.
“Билигин араас сурах- садьык, араас иһитиннэриилэр социальнай ситиминэн кэлэ турар. Манна барытыгар итэҕэйэр табыллыбат. Дойду үрдүнэн информационнай сэрии бара турар диэххэ сөп. Маныаха биһиэхэ саамай чугас иһитиннэрэр тэрилтэбитинэн улууспут хаһыата буолар. “Амма олоҕо” хаһыат – бу биһиги улууспут олоҕун кырдьыктаах кэрэһитэ, кэлэр кэскилгэ кэпсиир кэпсээнэ буолар. Кини нөҥүө биһиги улууспутугар буолар турар бары тэрээһиннэри, турар кыһалҕаларбытын, үтүө-мааны дьоннорбут туһунан билэ, ааҕа олоробут. Хаһыат нөҥүө бэйэбит этиилэрбитин, ыйытыыларбытын тиэрдэбит. Улуус дьаһалтата уонна нэһилиэктэр нэһилиэнньэни кытта биир ситиминэһэбит. Бүгүҥҥү күҥҥэ хомойуох иһин дьон аахпат буолла, хаһыат сурутуута аҕыйаан иһэр. Оннук буолуо суохтаах. Хаһыат бу улуус сиэркилэтэ. Ханнык баҕарар кэлбит ыалдьыт бүгүн да, кэнэҕэскитин да хаһыаты илиитигэр ылан аахтаҕына, туох буола турарын, буолбутун, кини историятын, култууратын билиэҕэ. Онон, ытыктабыллаах улуус олохтоохторо, хас биирдиигитин улууспут собус соҕотох “Амма олоҕо” хаһыатыгар суруттарыҥ диэн ыҥырабын! Бу биһиги уопсай дьыалабыт, биһиги улууспут инники кэскилэ. Хаһыаппыт тыыннаах буоллаҕына, биһиги олохпут да долгуна тохтуо суоҕа”, – диэн Степан Николаевич санаатын тириэртэ.
Бу күннэргэ Степан Николаевич муниципальнай тэриллиилэр сийиэстэригэр кытта сылдьар. Кини бары кэллиэгэлэрин, тэрилтэлэр салайааччыларын, олохтоохтору хаһыакка сурутарга тиэтэйэргэ ыҥырда.
“Дьокуускай куоракка тыа хаһаайыстыбатын түмүктэрин таһаарыыга буолбут улахан мунньахха Аммабыт улууһа бу эйгэҕэ бастыҥ улууһунан ааттанна. Бу үөрүүбүтүн эмиэ хаһыаппытын кытта үллэстиэхпит, кэпсиэхпит турдаҕа”, — диэн баһылык үтүө сонуну үллэһиннэ.
Күндү улууспут олохтоохторо!
Улуус баһылыгын ыҥырыытын ылынан, бары биир сомоҕо буолан бу нэдиэлэҕэ көхтөөхтүк кэлэр сылга хаһыаты ылан ааҕарга тиэтэйиҥ!
“Амма олоҕо” хаһыат